Elikópteru hosi kompañia aviasaun MCDERMOTT Austrália ho númeru N365JA iha Aeroportu Comoro. Imajen Tatoli/António Gonçalves.

DILI, 18 maiu 2021 (TATOLI)—Sekretária Estadu Protesaun Sivíl (SEPS), transporta apoiu umanitáriu ba munisípiu Ermera, hodi bele responde ba família afetadu dezastre naturál.

Komunikadu ne’ebé Agência Tatoli asesu, tersa ne’e, hateten,  sasán umanitáriu ne’e hanesan foos ho kilograma 25 hamutuk saka 195, biskuit kaixa 34, super mie kaixa 200, mina kaixa 34 no susu-been kaixa 16.

Notísia relevante:Stock sasán laiha, SEPS suspende apoia vítima inundasaun iha Dili

Sasán hirak-ne’e transporta iha 17 maiu 2021, ho elikópteru ne’ebé alugadu hosi Governu Austrália no Kompañia petrolfeira Santos.

“Ita transporta ba Ermera tanba armajén mamuk ona, nune’e hafásil bainhira akontese dezastre ruma bele distribui ho lalais tanba dezatre ita la espera,’’ Komunikadu ne’e haktuir.

Tuir dadus, munisípiu Ermera iha família 170 mak afetadu ba dezastre naturál ne’ebé akontese  04 abríl.

SEPS halo distribuisaun apoiu umanitáriu ba munisípiu-sira besik konklui ona no oras-ne’e daudaun iha Dili suspende provizóriu tanba estoke sasán laiha ona.

SEPS mós hato’o ona pedidu ba Ministériu Finansa (MF), liu hosi fundu kontijénsia hamutuk millaun $12, atu bele halo akizasaun ba nesesidade bázika ba apoiu umanitáriu ba vítima dezastre naturál iha territóriu.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here