Membru PNTL hala’o patullamentu tama-sai bairru iha Dili, hodi asegura komunidade iha situasaun serka sanitária, kuarta (12/05/21). Imajen Tatoli/António Gonçalves.

DILI, 18 maiu 2021 (TATOLI)—Polísia Nasionál Timor-Leste (PNTL), hapara sarani-sira hosi Arkedioseze Dili, ne’ebé reza ‘Tersu ba páz iha rai Timór’, iha jardín estátua Na’in-Feto Lecidere, tanba konsidera kontra regra Estadu Emerjénsia.

Portavóz Komandu Jerál PNTL, Superintendente Xefe, Arnaldo de Araújo, hato’o klarifikasaun ne’e hodi normaliza debate públiku kona-bá serbisu PNTL ne’ebé la kontra lei, maibé implementa lei hodi asegura saúde públiku hosi ameasa peste letál COVID-19.

Notísia relevante:Dezobediénsia, PNTL prosesa abitante 95 ba MP

Nia esplika, Komandante munisípiu Dili, Superintendente Xefe, Henrique da Costa ho ekipa ba hasoru ona komisaun organizadora, hodi aprezenta karta ida ba Arkedioseze Metropolitana Dili, ne’ebé hato’o direta ba Arsebispu Dom Virgílio do Carmo da Silva, ne’ebé hala’o kedan enkontru atu buka solusaun ba dezintendimentu ne’e.

“PNTL mak haruka Padre-sira hapara atividade reza ‘Tersu ba páz iha rai Timór’, no haruka sarani-sira fila ho razaun, TL implementa hela Estadu Emerjénsia, Serka Sanitária no Konfinamentu Domisiliáriu Jerál,” nia esplika liu hosi konferénsia imprensa, iha Komandu Jerál PNTL, Caicoli, tersa ne’e.

Arnaldo de Araújo hatutan, tuir loloos atividade ne’ebé orienta hosi Amu Papa hodi hato’o ba Igreja Katólika, tenki hato’o karta pedidu ba PNTL iha loron haat antes.

“Iha karta pedidu autorizasaun ne’ebé Komisaun Organizadora hato’o ba PNTL Dili, iha 13 maiu 2021 ho ajenda kompletu, maibé pedidu ne’e PNTL konsidera urjente no seidauk hetan aseitasaun,” nia subliña.

Tuir karta pedidu ne’ebé Agência Tatoli asesu, Koordenadór Jerál ‘Tersu ba páz ba rai Timór’, Evangelino Mateus Lim de Sousa hato’o ba PNTL iha 13 maiu, hodi husu autorizasaun ba PNTL, atu hala’o prosesaun iha 14 maiu 2021 iha tuku 14:00 otl.

Bainhira sarani no Padre-sira hala’o hela orasaun hamutuk, derrepente membru Unidade Polísia Marítima (UPM) hapara atividade ne’e, hodi hamosu reasaun kontra makás hosi sarani-sira to’o sai debate públiku liuliu iha média sosiál.

Entretantu Rezolusaun Governu ba impozisaun konfinamentu domisiliáriu jerál ba ema hotu-hotu ne’ebé hela iha Munisípiu Dili, hahú hosi 13 maiu 2021, tenke hela iha uma ka iha alojamentu temporáriu, eseptu iha razaun forte, liuliu relasiona ho seguransa públika, serbisu no ba asesu sasán no serbisu ba nesesidade bázika.

Rezolusaun Governu kona-bá impozisaun konfinamentu domisiliáriu jerál, sita mós katak, autoridade polisiál fiskaliza kumprimentu ba regra ne’ebé hatuur ona iha Rezolusaun ne’e, aviza infratór-sira bainhira la kumpre Rezolusaun ne’e, konsidera prátika krime dezobediénsia.

Autoridade polisiál sei komunika ba Ministériu Públiku kona-bá identidade hosi ema ne’ebé, hafoin avizu ne’ebé prevee iha fraze anteriór no kontinua la respeita regra ne’ebé prevee ona iha Rezolusaun Governu.

Bainhira ema hosi estranjeiru la respeita  regra-sira ne’ebé prevee iha Rezolusaun Governu ne’e, autoridade polisiál sei komunika sira-nia identidade ba Serbisu Migrasaun.

Rezolusaun ne’e mós bandu movimentu transporte públiku iha área-sira hotu iha Munisípiu Dili, liuliu, mikrolete, taxi no anguna.

Bandu atividade relijioza ne’ebé implika ezisténsia ema halibur-malu. Ba efeitu Rezolusaun Governu ne’e, konsidera nu’udár ema halibur-malu  liu hosi na’in-rua, tenke iha distánsia fízika menus hosi metru rua.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here