Primeiru-Ministru, Taur Matan Ruak. Imajen TATOLI/Egas Cristóvão

DILI, 18 maiu 2021 (TATOLI)–Primeiru-Ministru (PM), Taur Matan Ruak, sente triste ho notísia kona-ba asidente ró Adewa-01 ne’ebé tula ema na’in-hitu mout iha tasi klaran dirasaun Dili-Ataúru.

“Ha’u sente triste no lamenta tebes bainhira rona notísia kona-ba ró mout iha tasi atu bá Ataúru, ne’ebé tula ita-nia sidadaun na’in-hitu, Grasas Deus na’in-tolu konsege salva-an maibé infelizmente sira na’in-rua mate no hetan ona, enkuantu na’in-rua seluk ita seidauk hatene paradeiru,” Xefe Governu hato’o sentimentu triste ne’e liuhosi nota imprensa ne’ebé Agência TATOLI asesu iha tersa ne’e.

Nune’e, Xefe Ezekutivu lori naran rasik no Governu nia naran hodi hato’o profunda sentidu kondolénsia ba família ne’ebé matebian sira husik hela.

“Iha momentu difísil ne’e, ha’u-nia naran rasik no Governu hakarak hato’o profunda sentida kondolénsia ba família matebian na’in-rua no apoiu solidariedade ba família na’in-rua ne’ebé nia família seidauk hetan iha akontesimentu difísil ida-ne’e, husu kontinua korajen no mai ita hasa’e orasaun ba Maromak atubele hatudu dalan hodi bele hetan lalais ita-nia maluk na’in-rua,” nia akresenta.

Biban ne’e,  PM hakarak apela mós ba Ataúru-oan sira, atu atensaun didi’ak ba klima tasi, tenke kudadu an bainhira atu halo viajen ho ró kiik bá Ataúru.

Iha sábadu (15/05) ne’e, abitante na’in-hitu sai hosi portu marítima, Lecidere, maizumenus tuku 09:30 dadeer, ho ró kiik atu bá Ataúru, maibé to’o tasi klaran mout.

Nune’e, iha domingu dadeer tuku 08:00, ekipa konjunta konsege hetan abitante na’in-tolu no salva ho kondisaun di’ak, iha tasi área Cristo Rei.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here