Reprezentante OMS iha Timor-Leste, Arvind Mathur. Imajen TATOLI/Egas Cristóvão

DILI, 18 maiu 2021 (TATOLI)—Reprezentante Organizasaun Mundiál Saúde (OMS) iha Timor-Leste, Arvind Mathur, hasoru malu ho Primeiru-Ministru (PM), Taur Matan Ruak hodi buka solusaun hamutuk kombate COVID-19 iha Timor-Leste.

“OMS husu ba Ministériu Saúde atu kontinua implementa restreiu ba kontaktu no kontinua aplika target screaning, signifika katak bainhira iha ema ida pozitivu iha fatin ne’e, entaun tenke halo rastreiu kontaktu ba fatin detetadu pozitivu,” Reprezentante OMS relata hafoin ramata reuniaun ho Xefe Governu iha Rezidénsia Farol, tersa ne’e.

Durante enkontru, OMS fahe hanoin no ideia balun ba Xefe Ezekutivu, nune’e bele apoia Governu responde ba kazu infetadu COVID-19 ne’ebé kada loron sempre aumenta, liu-liu iha kapitál Dili

“Rekomenda mós atu kontinua implementa medida prevensaun hotu no buka hatene ema sira ne’ebé iha sintoma atu izola sira,” nia akresenta.

Iha biban ne’e, OMS kontinua enkoraja populasaun atu kumpre medida prevensaun COVID-19 ho rigór.

“Ami sempre fó rekomendasaun atu uza máskara bebeik, aplika distansiamentu, fase liman bebeik, no evita halibur malu iha fatin públiku,” nia hatutan.

Tuir Arvind Mathur, papél OMS mak atu redúz transmisaun COVID-19,  nune’e númeru infetadu labele aumenta ba bebeik.

“Ami kontinua fó asisténsia ba Ministériu Saúde atu kontinua sosializa medida prevensaun sira, tanba bainhira komunidade la halo tuir medida prevensaun maka kazu kontinua sa’e,” nia subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here