Timor-Leste no EUA lansa liña direta kombate krime alfandegáriu, iha salaun Ministériu Finansa, Aitarak-laran, tersa (18/05). Imajen TATOLI/António Gonçalves

DILI, 18 maiu 2021 (TATOLI)–Ministériu Finansa (MF) lansa apoiu foun hosi Estadu Unidu Amérika (EUA), ba liña direta gratuita atu ajuda kombate krime alfandegáriu, ne’ebé permite ema hato’o keixa kona-ba atividade deskonfia iha kualker oras liuhosi númeru gratuita 12200 ka pájina www.customs.gov.tl.

Diretór Jerál Autoridade Aduaneira (AA)/Alfándega, José António Fátima Abílio, hateten, liña direta ne’e ajuda proteje importasaun narkótika, kilat, no aimoruk falsu sira, nune’e fó biban ba autoridade rekolla reseita di’ak liután.

Diretór Jerál AA/Alfándega, José António Fátima Abílio. Imajen TATOLI/António Gonçalves

“Reseita ne’e importante tebes tanba bele ajuda selu fali Governu nia atividade servisu importante seluk hanesan kuidadu saúde, edukasaun, no infraestrutura,” Diretór Jerál Alfándega, relata liuhosi diskursu iha ámbitu lansamentu iha salaun MF, Aitarak-laran, tersa ne’e.

Aleinde ne’e, Timor-leste nia tarifa no taxa alfándega tama kategoria kiik iha nível globál maibé krime kontinua tama iha nasaun liuhosi sasán ne’ebé laiha kualidade no ilegál seluk.

“Estadu lakon reseita boot no atividade ilegál kontinua la’o, halo autoridade lakon konfiansa ba negosiadór sira ne’ebé mak esforsu maka’as tebes tuir regulamentu,” nia akresenta.

Timor-Leste no EUA lansa liña direta kombate krime alfandegáriu, iha salaun Ministériu Finansa, Aitarak-laran, tersa (18/05). Imajen TATOLI/António Gonçalves

Diretór ne’e konsidera, ho tempu naruk kriminozu sira konsege foti osan ne’ebé tuir loloos bele uza ba eskola no infraestrutura, tanba ne’e ho plataforma foun, públiku bele ajuda autoridade.

“Ami garante ba públiku katak bainhira simu kontaktu sira hotu sei sai segredu no kompromete sei halo asaun,” nia afirma.

Iha fatin hanesan, Ministru Finansa, Rui Augusto Gomes, hateten, fasilidade ne’e hanesan dalan ida atu hadi’a liután servisu atendementu kliente AA.

Ministru Finansa, Rui Augusto Gomes. Imajen TATOLI/António Gonçalves

“Ha’u fiar katak ho uzu teknolojia avansadu ne’e, funsionáriu aduaneira sira sei bele halo sira-nia serbisu ho di’ak liután liuhosi atende ita-nia kliente sira ho maneira efisiente no efikásia liután bazeia ba regra no regulamentu hodi promove transparénsia no akuntabilidade iha administrasaun no kolesaun reseita,” nia dehan.

Nune’e mós, Embaixadór EUA iha Timor-Leste, Kevin Blackston, reforsa, apoiu ne’e hodi prevene korupsaun no haforsa governasaun di’ak, liuhosi liña kontaktu foun sei permite públiku bainhira haree krime bele informa ho livre, seguru no segredu ba AA.

Embaixadór EUA iha Timor-Leste, Kevin Blackston. Imajen TATOLI/António Gonçalves

Liña kontaktu Aduaneira ne’e realiza nu’udar parte ida hosi United States Agency for International Develoment (USAID) nia projetu atu reforma aduaneira, ho orsamentu millaun $8,8 ba tinan-haat.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here