Diretora Ezekutiva Forum Komunikasaun Feto Timor Lorosa'e (FOKUPERS), Maria Fátima Perreira Guterres. Imajen/Espesiál

DILI, 18 maiu 2021 (TATOLI)-Forum Komunikasaun Feto Timor Lorosa’e (FOKUPERS) husu ba Governu liuhosi instituisaun xave sira buka solusaun ba situasaun serka sanitária no konfinamentu domisiliáriu ne’ebé fó impaktu boot tebes ba ekonomia rai-laran no afeta ba feto no labarik ho ema marjinalizadu sira-nia kondisaun to’o sofre ba hamlaha tanba kampu servisu barak mak taka.

Notísia Relevante : Kada loron, abitante uma-kain 700 husu ai-han ba Madre Kanosiana

Diretora Ezekutiva FOKUPERS, Maria Fátima Perreira Guterres, hateten iha situasaun agora  instituisaun xave sira hanesan, Ministériu Koordenadór Asuntu Ekonómiku, Ministériu Solidariedade Sosiál no Inkluzaun (MSSI) atu ajuda fornese ai-han hanesan Cesta Bázika ba ema vulneravel hotu.

“Importante mak buka mekanizmu no hadi’a sistema ne’ebé di’ak no adekuadu hodi responde ba situasaun tuir Timor-Leste nian, tanba FOKUPERS hanesan organizasaun ne’ebé harii ho objetivu prinsipál atu promove no hametin direitu feto no labarik feto atu elimina diskriminasaun ba feto no labarik feto, elimina violénsia bazeia ba jéneru iha forma hotu no dezenvolvimentu hametin sistema Estadu ne’ebé proteje direitu feto-sira,” Maria Fátima Perreira Guterres, hateten liuhosi konferénsia imprensa iha Marfin FOKUPERS, Farol, Dili, tersa ne’e.

FOKUPERS husu ba Ministériu Administrasaun Estatál (MAE) fó instrusaun ba lideransa komunitáriu-sira atu konsidera no fó importánsia ba baze dadus ema hirak ne’ebé hela iha uma aluga “kost”, atu nune’e, ajuda umanitária ne’ebé fornese ba suku-sira la’ós de’it fó importánsia ba sira ne’ebé ho fixa família, maibé presiza konsidera mós sidadaun-sira ne’ebé hela iha uma “kost”.

FOKUPERS husu ba doadór no parseiru dezenvolvimentu-sira, presiza atu akompaña no fó tulun nafatin ba ONG lokál, organizasaun sira iha baze no mós Igreja hodi bele responde ba situasaun atuál relasiona serka sanitária no konfinamentu obrigatóriu ne’ebé fó impaktu ba problema ekonomia, saúde, no nutrisaun liuliu ba feto no labarik.

“Husu ba polítiku-sira iha situasaun agora presiza buka no prova faktu ho parte kompetente sira iha terrenu hodi haforsa no verifika ita-boot sira-nia deklarasaun polítika fó sai atu bele reprezenta duni povu ki’ik no kbiit-laek sira-nia lian,” nia dehan.

Notísia Relevante : Prosesu autópsia ba mate-isin Levenita Madeira, depende pedidu MP

Relasiona ho akontesimentu iha loron 16 maiu 2021, matebian Levenita Madeira ne’ebé mate ho kondisaun tara-an no hamosu duvida iha públiku kona-ba akontesimentu ne’e,  FOKUPES konsidera maske rezultadu hosi autópsia fó sai katak matebian mate tanba tara-an duni, maibé informasaun ne’ebé FOKUPRS simu hosi família matebian liuhosi konferénsia imprensa katak matebian antes mate akontese uluk violénsia doméstika.

Notísia Relevante : SIKN halo identifikasaun ba SEAK Teófilo Caldas

FOKUPERS husu ba polísia Seksaun Unidade Ema Vulneravel (Vulneravel Person Unit/VPU) no Polísia Nasionál Servisu Investigasaun Kriminál (PNSIK) atu kontinua halo investigasaun no analiza kle’an ba abut ka kazu hosi matebian Levenita Madeira ninia mate.

FOKUPERS husu ba Ministériu Públiku nu’udár na’in  ba asaun penál no reprezenta vítima atu nafatin kontinua kolabora ho família matebian nian, nune’e hodi bele hatuur lia loos tuir nian dalan.

“Ba Sekretária Estadu ba Iguala idade no Inkluzaun (SEII) no Provedór Direitu Umanu no Justisa (PDHJ) nu’udár matan tilun no lian ba feto no grupu vulneravel-sira atu bele hala’o duni sira-nia papél no obrigasaun hodi kontinua buka informasaun liuhosi estudu ka peskiza iha situasaun serka sanitária no konfinamentu obrigatóriu nia impaktu ba feto, labarik no ema kbiit-laek-sira nune’e bele halo advokasia no influensia ba foti desizaun iha nivel as,” nia hatutan.

FOKUPERS konsidera SEII  presiza haforsa mekanizmu servisu hamutuk ho Komisaun Funsaun Públiku (CFP-sigla portugés) hodi asegura implementasaun polítika zero toleránsia ba asédiu seksuál iha servisu fatin instituisaun públiku.

“Ami husu ba CFP favor asegura implementasaun polítika zero toleránsia ba asédiu seksuál iha servisu fatin sira iha instituisaun públiku hodi bele kria duni ambiente ne’ebé saudavel iha servisu fatin,” Maria Fátima Perreira Guterres afirma.

FOKUPERS rekomenda ba Primeiru-Ministru (PM) nu’udár Xefe Governu atu bele kontribui ba prosesu liuhosi suspende lai atuál Sekretáriu Estadu Arte no Kultura (SEAK), Teofilo Caldas, ne’ebé konsidera hanesan, autór ba krime, siklu violénsia doméstika hodi rezulta nia kaben mate.

Notísia Relevante : Mate-isin espoza SEAK transporta ba HNGV hodi halo autópsia

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here