Estudante-sira simu rezumu matéria iha eskola. Imajen Tatoli/Egas Cristóvão

DILI, 18 maiu 2021 (TATOLI) – Eskola Ensinu Báziku Filiál siklu 1, 2 Rumbia, Caicoli, Dili, distribui ona rezumu matéria primeiru no segundu trimestre ba estudante 604 atu estuda iha uma to’o juñu 2021.

Koordenadór Eskola EBF siklu 1, 2 Rumbia Caicoli, Abilio Pereira da Conceição, informa Eskola EBF Rumbia prepara rezumu matéria hodi oferese ba estudante to’o juñu  atu antesipa, karik Governu kontinua extende Estadu emerjénsia.

“Ita iha matéria dixiplina ualu mak hanesan, Lingua Portugés, Lingua Tetun, Edukasaun Sívika, Siénsia Naturaís, Siénsia Sosiaís, Relijiaun Morál, Edukasaun Desportiva, no Arte Kultura. Dixiplina sira-ne’e, ami distribui ona ba estudante-sira,” Abilio Pereira da Conceição, informa ba Agência Tatoli iha nia EBF Rumbia, Caicoli, Dili, tersa ne’e.

Eskola mós distribui traballu ba estudante-sira atu prienxe iha uma hodi hein desizaun Governu nian tuir mai iha situasaun pandemia COVID-19.

Nia informa, rezumu matéria to’o segundu trimestrál to’o juñu ne’e hanesan medida ida. Maibé, ba fulan oin, maka Governu deside kontinua extende Estadu emerjénsia, parte eskola sei husu ba profesór permanente na’in-16 atu prepara fali rezumu matéria foun ba alunu-sira.

Koordenadór EBF Rumbia ne’e hato’o preokupasaun katak, eskola kumpre ona devér hodi prepara rezumu matéria ba alunu-sira, maibé nia la garante alunu 604 kompostu hosi mane 327 no  feto 227 bele aproveita distribuisaun rezumu matéria sira-ne’e.

Jornalista       : Tomé Amado

Editór             : Francisco Simões

HAKEREK NO HATÁN

Please enter your comment!
Please enter your name here