Membru PNTL hala’o patullamentu tama-sai bairru iha Dili, hodi asegura komunidade iha situasaun serka sanitária, kuarta (12/05/21). Imajen Tatoli/António Gonçalves.

DILI, 18 maiu 2021 (TATOLI)—Durante loron haat, hahú hosi 14 to’o 18 maiu 2021, Polísia Nasionál Timor Leste (PNTL), rejista kazu asalta-malu, entre grupu joven hamutuk 12, inkuli kazu violénsia doméstika sia, iha territóriu tomak.

Portavóz Komandu Jerál PNTL, Superintendente Xefe, Arnaldo de Araújo, informa dadus ne’ebé parte Seksaun Kriminál rekolla hanesan insidente hamutuk 30 ho tipu kazu, asalta-malu 12, baku-malu rua, tuda-malu ida, estraga sasán ida, ema lanu todan halo problema ida, tara an ida, mout iha tasi na’in-hitu, no na’in-tolu hetan ho kondisaun sei moris, rua hetan ho kondisaun mate, na’in-rua lakon parte PNTL sei buka nafatin, inklui kazu violénsia doméstika sia.

Notísia relevante:Konfrontu iha Ermera, uma ida rahun

“Ita rejista kazu 30 hahú hosi 14 to’o 18 maiu ne’ebé ita kategoriza kazu aas liu maka asalta-malu 12, no violénsia doméstika sia,” Arnaldo de Araújo hateten ba jornalista-sira, liu hosi konferénsia imprensa, iha Komandu Jerál PNTL, Dili, tersa ne’e.

PNTL rekolla mós dadus hosi parte Seksaun Tránzitu ne’ebé rejista asidente tráfegu kanek kamán hamutuk 11 no ida mate, tanba karreta kamioneta ida baku-fila iha área Ermera, kauza hosi estrada aat.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here