Atividade iha kampu petrolífera, Bayu-undan. Imajen/Espesiál

DILI, 18 maiu 2021 (TATOLI)-Autoridade Aduaneira (AA)/Alfándega koordena ona ho Autoridade Nasionál Petróleu no Minerál (ANPM) atu fasilita empreza Santos halo importasaun no mobiliza materiál perfurasaun ba posu dahuluk iha kampu petrolífera Bayu-undan.

“Ami iha komunikasaun no halo ona enkontru tanba dezde tinan rua ba kotuk, ami serbisu hamutuk ho ANPM hodi halo lei no prosedimentu foun kona-ba servisu Alfándega atu fasilita perfurasaun mina-matan sira iha plataforma tasi Timór no rai maran,” Diretór Jerál  AA/Alfándega, José António Fátima Abílio, informa ba Agência TATOLI iha edifísiu Ministériu Finansa, Aitarak-Laran, tersa ne’e.

Tuir nia, Alfándega-ANPM iha ona akordu atu fasilita empreza sira halo importasaun ba materiál perfurasaun liuhosi analiza ekipamentu sira, hafoin entrega ba empreza atu halo mobilizasaun.

“Ha’u espera tempu badak sira bele hato’o informasaun, nune’e ami halo analiza ba ekipamentu sira ne’ebé presiza selu taxa tuir dalan legál,” nia akresenta.

Iha parte seluk, Prezidente ANPM, Florentino Soares Ferreira, hateten, preparasaun perfurasaun la’o di’ak tebes no iha fulan maiu nia laran sei halo mobilizasaun ekipamentu perfurasaun ba Bayu-undan.

ANPM garante atividade perfurasaun posu petrolíferu ne’e sei fó benefísiu ekonómiku ba Timor-Leste no bele otimiza rekuperasaun kampu Bayu-undan nia vida ba tinan ida tan tanba antes ne’e atu desmantela iha tempu badak tanba laiha oa produsaun.

Aleinde ne’e, bele benefisia ba tékniku timor-oan hamutuk 30-resin inklui kompañia nasionál sira ba servisu laundry no hahán.

Empreza Santos iha kompromisu atu halo investimentu ho montante millaun $235 ba projetu perfurasaun mina-matan tolu iha Bayu-undan.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here