Sentrál eletrika Betano. Imajen/wiki

DILI, 17 maiu 2021 (2021)–Eletricidade de Timor-Leste, Empreza Públika (EDTL, E.P) kontinua  husu ba Timor Gás no Petróleu, Empreza Públika (Timor GAP, E.P) atu kumpre kalendáriu fornese kombustível ba sentrál elétrika Betano.

“Ita haree loloos iha fulan-abríl ne’e Timor GAP hatama ona mina maibé seidauk iha preperativu no mobilizasaun, entaun adia fali ba loron 11 maiu, maibé seidauk fornese to’o agora. Tanba ne’e, ami fó ona karta xamada antensaun ba sira no agora iha faze preparasaun no mobilizasaun,” Prezidente Konsellu Administrasaun EDTL,E.P, Paulo da Silva, hateten ba Agência TATOLI, iha ninia knaar fatin, Caicoli, segunda ne’e.

Notísia relevante: EDTL-Timor GAP selebra akordu fornese kombustível iha sentrál elétrika Betano

Maski nune’e, Timor GAP halo ona aranju tékniku ho empreza MATO atu fornese uluk kombustível ba sentrál elétrika Betano hafoin empreza estatál ne’e kontinua.

EDTL, E.P liuhosi ekipa téknika kontinua halo monitorizasaun ba Timor GAP nia preparasaun no mobilizasaun hodi bele kondisiona kombustível tuir kalendáriu kontratu nian.

“Ita kontinua buka meiu atu Timor GAP tenke lori mina ba sentrál elétrika Betano, nune’e ita garante ahi sei la mate tanba EDTL halo ona jestaun téknika hodi fornese mina iha sentrál elétrika Hera ba iha Betano,” nia esplika.

Tanba ne’e, Governu deside estende kontratu empreza MATO no Esperansa Timor-oan (ETO) atu fornese kombustível ba sentrál eletrika Hera liuhosi EDTL, E.P durante fulan-ualu tan.

“Empreza rua ne’e la’ós fornese kombustível ba sentrál elétrika sira, maibé sira hetan kontratu hosi Governu atu hatama kombustível ba EDTL, E.P, ne’ebé ami mak jere la’ós sira mak jere rasik hodi fornese ba sentrál elétrika sira,” nia informa.

Daudaun ETO halo hela deskaregamentu ba mina iha Hera ho kuantidade tonelada 6.000-resin, hafoin empreza MATO mós halo deskaregamentu maibé ró sei atraka iha tasi-laran.

Timor GAP fornese kombustível ba sentrál elétrika Betano hafoin hetan vistu préviu hosi Tribunal das Contas.

Tuir kontratu hosi parte rua, empreza estatál ne’e sei fornese iha faze tolu, ne’ebé iha faze dahuluk sei fornese litru 10.000 no kontinua fornese durante períodu tinan rua-resin ho kustu orsamentu millaun $50.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here