Ministru Transporte no Komunikasaun, José Agostinho da Silva, akompaña hosi Prezidente ANC, João Oliveira Freitas, entrega sertifikadu rejistrasaun ISP ba SACOMTEL, iha salaun MTK, Caicoli, segunda (17/05). Imajen Tatoli/Natalino Costa

DILI, 17 maiu 2021(TATOLI)—Ministériu Transporte no Komunikasaun (MTK) liuhosi Autoridade Nasionál Komunikasaun (ANC, sigla portugés) atribui sertifikadu rejistu servisu fornesimentu liña internet ka Internet Service Provider (ISP) ba empreza SACOMTEL, Lda ho númeru rejistrasaun 05.

Ministru Transporte no Komunikasaun, José Agostinho da Silva, husu empreza hatudu asaun konkreta hodi bele kontribui ba área teknolojia iha Timor-Leste.

“Ba ha’u, labele hela de’it ho sertifikadu hafoin rai de’it, maibé tenke hatudu asaun iha terrenu liuhosi halo atendimentu ba kliente ho dignu no kualidade, ho velosidade internet di’ak no presu kompetetivu,” Ministru dehan iha salaun MTK, Caicoli, segunda ne’e.

Notísia relevante: ANC sertifika servisu fornesimentu liña internet Raph Vision

Nia konsidera, prezensa empreza ISP bele kontribui ba fornesimentu liña internet ne’ebé durante ne’e lentu, liuhosi sistema rigorozu no kustu razoavel.

Atribuisaun sertifikadu rejistu fornesimentu liña internet tanba SACOMTEL kompleta ona regra tuir dekretu-lei númeru 15/2012, 28 marsu, kona-ba regulamentu ba setór telekomunikasaun, iha artigu 30 kona-ba rejistu, ne’ebé deskreve katak ema ida labele presta servisu telekomunikasaun, ka opera rede relekomunikasaun ida, enkuantu seidauk rejistu iha ANC, atu presta servisu no fornese rede telekomunikasaun ba kliente.

Tuir Ministru, atribuisaun serfikadu ISP liu prosesu naruk tebes no ikus mai empreza kompleta rekezitu.

Iha sorin seluk, Diretór SACOMTEL Lda, Salvador Tilman, agradese ba Governu liuhosi MTK no ANC bele fó ona oportunidade hodi investe.

“Ho orgullu no haksolok boot, hodi naran Grupu SACOM no empreza SACOMTEL, no espesialmente Prezidente Konsellu Administrasaun, Señor Abílio Araújo nian, ha’u agradese ba VIII Govemu tanba fó oportunidade ida ne’e ba ami hodi bele hahú halo investimentu hanesan empreza ISP,” nia dehan.

Nia konsidera, ho liberalizasaun telekomunikasaun iha tinan 2012, Timor-Leste loke dalan ba operadór telekomunikasaun hodi bele investe atu tuir merkadu kompetisaun nian, hodi bele serbí di’ak liután ba konsumidór sira.

“SACOMTEL sei hahú uluk liu fornese internet liuhosi satelite, frekuénsia rádiu ka fibra ótika, tanba área telekomunikasaun hanesan área desenvolvimentu di’ak iha futuru,” nia akresenta.

Responsável empreza ne’e haktuir, SACOMTEL hahú investe atu dada fibra óptika hosi kabu submarinu independente ne’ebé oras ne’e pertense ba konsórsiu internasional, liga hosi Singapura bá Austrália liuhosi Tasi Feto iha Dili.

“Ho Investimentu ida ne’e, ami sei kontribui ba dezenvolvimentu no haburas ekonomia tamba Timór sei bele sai dijitál iha rejiaun sudeste aziátiku,” nia hatutan.

Antes ne’e, ANC atribui ona sertifikadu rejistrasaun ISP ba empreza Gardamor, Metrolink, Global-net, Raph Vision  Unip.LDA no tuir planu sei fó tan ba empreza seluk ne’ebé halo servisu fornesimentu internet iha Timor-Leste.

 Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here