Sekretáriu Estadu Kooperativa, Elizário Ferreira. Imajen TATOLI/António Gonçalves

DILI, 17 maiu 2021 (TATOLI)—Sekretáriu Estadu Kooperativa (SEKoop), Elizário Ferreira, komprometidu to’o fulan-dezembru tinan ne’e sei estabelese kooperativa iha postu administrativu hotu.

“Agora iha ona ajenda ba halo formasaun iha territóriu laran, liu-liu iha postu administrativu atu estabelese kooperativu hamutuk 31,” Sekretáriu Estadu informa iha edifísiu Akait, segunda ne’e.

Tuir governante ne’e, loloos iha jullu tinan ne’e estabelese hotu ona kooperativa kréditu iha postu administrativu, maibé pendente tanba situasaun pandemia COVID-19.

“Situasaun halo ami labele la’o, maibé ami promete katak to’o dezembru ne’e postu administrative 65 iha Timór sei iha kooperativa hotu, ne’e ami-nia kompromisu,” nia akresenta.

Maski situasaun serka sanitária no konfinamentu domisiliáriu obrigatóriu jerál, maibé serbisu SEKoop relasiona ho kooperativa kontinua la’o.

“Ami-nia departementu sira halo hela supervizaun no monitarizasaun hodi akompaña nafatin sira-nia dezenvolvimentu kooperativa,” nia hatutan.

Iha tinan 2020, SEKoop konsege harii kooperativa produsaun hamutuk 62 inklui hamoris kréditu uniaun 22.

Entre postu administrativu 67 iha territóriu, 33 maka seidauk iha kooperativa, enkuantu postu administrativu 34 iha ona.

Daudaun SEKoop hahú atu hadi’a kooperativa ne’ebé eziste no haree fatin seidauk iha sei harii, nune’e postu administrativu ida bele iha kooperativa.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here