Prezidente Konsellu Ezekutivu INCT, Jose Cornelio Guterres. Tatoli/ Egas Cristóvão

DILI, 17 maiu 2021 (TATOLI) – Prezidente Konsellu Ezekutivu Institutu Nasional Siénsia Teknolojia (INCT), José Cornelio Guterres, hateten iha tinan oin 2022, INCT sei rejista International Standard Book Number (ISBN) atu asegura obra akadémiku hosi plajiárizmu (copy-paste) pesoál irresponsavel-sira.

Notísia Relevante : INCT deskobre área edukasaun-turizmu abandonadu

Prosesu atu apoiu planu INCT nian hodi hetan ISBN ne’e maka daudaun INCT prepara ona vaga ba peritu internasionál  na’in-rua atu apoiu prosesu administrativu hodi hetan ISBN.

“Ami agora halo ona preparasaun, ami garante 2022 bele rejistu ona. Tanba ne’e ami hahú uluk ho rekrutamentu ba peritu internasionál na’in-rua ne’ebé hatene liu prosesu oinsá atu hetan ISBN ne’e,”

Ba Agência Tatoli iha nia servisu fatin iha Dili, segunda ne’e, prezidente INCT José Cornelio, aprofunda katak ISBN ne’e atu asegura rezultadu obra akadémiku ne’ebé peskizadór-sira hakerek ona iha livru no kuandu públika ema seluk labele copy no paste. Se ida ne’e mak akontese duni tenke iha sansaun hanesan blacklist tiha peskizadór ne’e hosi ninia peskiza akadémiku nian.

Nia informa, Timor Leste seidauk iha lisensa ba ISBN, tan ne’e, bainhira rezultadu peskiza-sira dala-barak públika tenke aplika iha Fransa, Portugál, Indonézia no Brazil. Maibé INCT mak iha ona ISBN ne’e la presiza aplika ona ba internasionál liu de’it hosi INCT bele públika ona.

INCT mós sei sosa software atu ajuda hodi deteta pesoál ruma halo plajiárizmu, maibé dalan primeiru maka INCT sei orienta peskizadór-sira atu hakerek obra  sira ho lian Ingles no Portugés tanba lian Tetun software la deteta.

“Kuandu iha  ona software no ISBN, ita bele hamosu regra ida rigorozu,” nia afirma tan.

Jornalista       : Tomé Amado

Editór             : Francisco Simões

HAKEREK NO HATÁN

Please enter your comment!
Please enter your name here