Logotipu Enjeñaria Siénsia Teknolojia, Universidade Nasionál Timor Lorosa'e (UNTL).

DILI, 17 maiu 2021 (TATOLI) – Estudante Universidade Nasionál Timor Lorosa’e (UNTL) Fakuldade Enjeñaria Siénsia Teknolojia finaliza konstrusaun dormitóriu ho fundus $12,652 iha Komunidade Kanosianu Hera hodi apoiu inan isin-rua no inan fó susu ho labarik sira atu hela iha fatin seguru.

Padre Kapelaun UNTL, Pe. Nivio Correia Lebre, hateten konstrusaun dormitóriu  ne’ebé akumula kama entre 23 to’o 30 ne’e, estudante enjeñaria siénsia no teknolojia UNTL finaliza ho orsamentu purvolta $12,652 ne’ebé apoiu hosi providénsia Padre  Kanosianu-sira iha Italia.

“Ami hakarak aselera prosesu ne’e atu ita nia inan feton isin-rua no inan fó susu bele hela iha fatin ida dignu hodi hein planu Governu nian tuir mai. Tan ne’e, ita-nia alin estudante-sira konsege realiza konstrusaun ne’e iha de’it loron 30 nia laran,” Padre Nivio Lebre hateten ba jornalista sira iha serimónia inaugurasaun dormitóriu iha Hera, segunda ne’e.

Padre Nivio hateten komunidade Kanosianu laiha buat ida atu selu ba estudante-sira no  materiál ne’ebé sira simu gratuitamente mai hosi providénsia ema seluk nian.

Iha fatin hanesan Magnífiku Reitór UNTL, João Soares Martins mós akresenta prosesu konstrusaun dormitóriu ne’e realiza tanba servisu hamutuk entre komunidade Kanosianu ho Estudante enjeñaria UNTL  iha Hera.

“Ita-nia estudante sira fó de’it tempu tomak durante fulan ida resin hodi realiza konstrusaun dormitóriu ba inan isin-rua no inan fó susu sira,   ne’ebé materiál hotu mai hosi komunidade Kanosianu liuhosi apoiu ne’ebé sira hetan hosi komunidade Kanosianu iha rai li’ur,” João Soares Martins hateten.

Hanesan reitór nia orgullu ba servisu estudante enjeñaria sira nian tanba ho tempu ne’ebé badak sira bele finaliza konstrusaun ne’e ho lalais hodi lori maluk refujiadu-sira ne’ebé  afetadu hosi dezastre naturál iha loron 04 abríl liubá.

Jornalista       : Tomé Amado

Editór             : Francisco Simões

HAKEREK NO HATÁN

Please enter your comment!
Please enter your name here