Komunidade hamutuk ho ekipa kojunta, Unidade Polísia Maritima (UPM), postu administrativu Ataúro, munisipiu Dili, hetan tan mate isin António Alves (53) iha área Tasi Ataúro, segunda (17/05/21). Imajen/Facebook.

DILI, 17 maiu 2021 (TATOLI)—Ekipa konjunta hosi Unidade Polísia Marítima (UPM), postu administrativu Ataúro, munisipiu Dili, hamutuk ho komunidade hetan tan mate-isin António Alves (53) iha área tasi klaran parte Ataúro.

Komunidade hamutuk ho ekipa konjunta hetan mate-isin António Alves, ho kondisaun namlele hela iha bee leten, área Berau-Ataúro iha tuku 15:10 otl.

Notísia relevante:UPM-Komponente Navál hetan ona mate-isin Daniel Martins

Hafoin hetan mate-isin, UPM transporta kedan ba matebian nia-moris fatin suku Beloi, ne’ebé simu direta hosi família.

Komandante UPM, Superintendente Asistente, Basílio de Jesus, informa ekipa hamutuk ho komunidade sei kontinua buka nafatin vítima na’in-rua seluk ne’ebé seidauk hetan.

“Mate-isin ida tan ita-nia komunidade ho ekipa UPM, foin hetan iha área tasi Berau no lori kedan ba Ataúro,” Basilio de Jesus hateten ba jornalista, iha edifísiu UPM Lecidere, Dili, segunda ne’e.

Basilio de Jesus esplika, vítima-sira hasoru dezastre, tanba kapasidade ró ne’ebé vitima-sira utiliza tula sasán todan, hanesan, simente saka 50, gazoel litru 450, aumenta tan vítima na’in-hitu, halo kapasidade ró labele aguenta bainhira hasoru korrente tasi ne’ebé makás.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here