Uma akollamentu ne’ebé konstrui hosi komunidade Saleziana Dom Bosco Comoro no inaugural iha 16 maiu 2021. Imajen Tatoli/Nelson de Sousa.

DILI, 17 maiu 2021 (TATOLI)—Arsebispu Arkedioseze Metropolitana Dili, Dom Virgílio do Carmo da Silva, SDB, inaugura uma akollamentu ba família 39, ne’ebé konstrui hosi komunidade Saleziana Dom Bosco Comoro, hodi fasilita vítima inundasaun iha 4 abríl.

Dom Virgílio konsidera inundasaun sai oportunidade ba Uma-Kreda, atu asume fila-fali papél hanesan uluk tempu funu ba independénsia no klandestina, iha ne’ebé Uma-Kreda identifika an ho povu.

Notísia relevante:CFP-Don Bosco Comoro harii uma provizóriu ba vítima dezastre naturál

Arsebispu ne’e agradese ba liman-ain hosi Uma-Kreda iha Timor-Leste (TL), hanesan relijiozu no relijioza sira, ne’ebé loke no simu vítima inundasaun.

“Apoiu ne’e emerjénsia no temporáriu de’it. Kompeténsia Governu atu prepara espasu ba família-sira no normaliza sira-nia moris tuir dignidade umana no direitu sidadaun,” Dom Virgílio hateten liu hosi komunikadu ne’ebé Agéncia Tatoli asesu, segunda ne’e.

Bibi-atan ne’e husu ba dezlokadu-sira atu iha pasiénsia, konfiansa no korajen, hodi hein Governu kumpre-ninia promesa.

Nune’e mós diretór uma Centro Formação Profisionál Don Bosco Comoro (CFP-DBC), Padre Hermenegildo Perreira, SDB, hateten maske ho pandemia no serka sanitária, maibé Saleziano-sira loke nafatin odamatan, hodi simu vítima ba inundasaun, liu-liu inan ho oan ki’ik, grávida no sira ne’ebé vulnerável.

Padre Hermenegildo Perreira dehan, durasaun tempu harii uma akollamentu ne’e durante loron 20.

Tuir dadus inísiu, iha ema hamutuk 3.000 mak hela iha sentru akollamentu Dom Bosco, balun fila ona no sira ne’ebé sei hela maka uma-ka’in 39 ho  ema 150.

Marka prezensa iha serimónia inaugurasaun ne’e, Sekretáriu Estadu Protesaun Sivíl  (SEPS), Joaquim Gusmão ho konvidadu-sira seluk.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here