Produtu Cesta Bázika. Imajen TATOLI/Antónia Gusmão

DILI, 17 maiu 2021(TATOLI)—Prosesu distribuisaun produtu Cesta Bázika hosi parte Sekretaria Estadu Kooperativa (SEKoop) iha munisípiu hitu hanesan Covalima, Aileu, Ainaro, Same, Manatuto, Lautém no Liquiçá, kuaze konklui.

“Progresu distribuisaun Cesta Bázika hosi ami-nia parte hela de’it 10% no agora ami halo hela teste swab tanba ha’u sei desloka hodi enserra distribuisaun iha Ainaro iha Liquiçá iha semana ida ne’e no semana oin enserra iha Manatuto no Lospalos,” Sekretáriu Estadu Kooperativa, Elizário Ferreira, informa iha edifísiu SEKoop, Akait, segunda ne’e.

Notísia relevante: MF finaliza ona pagamentu 94 ho montante millaun $25

Iha faze dahuluk konsege finaliza pagamentu ba kompañia fonesidór ne’ebé finaliza ona serbisu distribuisaun produtu.

“Agora kompañia sira ne’ebé sei iha prosesu distribuisaun maka tama iha pagamentu daruak, tanba ne’e  kuandu sira finaliza ona serbisu, bele submete dokumentu hodi SEKoop halo prosesu no Ministériu Finansa bele halo pagamentu, tanba orsamentu retifikativu foin daudaun mós prevee ona,” nia akresenta.

Bazeia ba dekretu-lei númeru 48/2020, 07 outubru, kona-ba medida apoiu família, atribuisaun Cesta Bázika, operadór ekonómika lokál iha ámbitu planu rekuperasaun ekonómika no kria rejime espesiál aprovizionamentu ba efeitu, iha artigu 10 kona-ba modalidade aprovizionamentu, temi katak aprovizionametu ba akizisaun produtu Cesta Bázika realiza bazeia ba modalidade ajudikasaun direta to’o limite verba ne’ebé aloka ba entidade ajudikante ne’ebé ministériu indika ona.

Ajudikasan direta ba kompañia sira tanba natureza programa Cesta Bázika ne’e emerjénsia, tanba difísil atu hili aprovizionamentu normál tanba lori fulan-tolu to’o neen mak foin finaliza, enkuantu programa ne’e implementa ba fulan-rua no estende tan ba fulan-rua.

Aprovizionamentu realiza hosi ministériu implementadór programa hanesan Ministériu Turizmu, Komérsiu no Indústria (MTKI), Ministériu Agrikultura no Peska, SEKoop, Sekretaria Estadu Ambiente (SEA) inklui Autoridade Rejiaun Administrativa Espesiál Oé-cusse Ambeno (RAEOA).

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here