Logotipu CVTL

DILI, 17 maiu 2021 (TATOLI)- Krús Vermella Timor-Leste (CVTL-sigla portugés), tersa (18/05), sei  halo enkontru virtuál ho parseiru sosiedade Krús Vermella-sira seluk iha mundu.

Notísia Relevante : CVTL komemora loron mundiál Krús Vermella ho tema “Hamutuk Ita La Para”

Parseiru sira ne’ebé sei tuir enkontru ne’e mak hanesan Movimentu Cruz Vermella no Cresente Veremelho. Tuir komunikadu imprensa ne’ebé Agência Tatoli asesu, segunda ne’e, katak enkontru ne’e nu’udar koordenasaun forum iha nivel aas jestaun entre parseiru Movimentu Krús Vermella no Cresente Vermelho ne’ebé sei suporta CVTL hodi halo tradusaun ba planu estratéjia ba dezenvolvimentu programa/projetu.

Espetasaun liuhosi forum ne’e mak iha diálogu ativu entre parseiru Movimentu Krús Vemella no Cresente Vermelho kona-ba oinsá kolaborativu parseiru Movimentu Krús Vermella no Cresente Vermelho kontinua atividade umanitáriu iha Timor-Leste liuhosi programa sira CVTL nian.

CVTL nu’udár organizasaun umanitáriu iha Timor-Leste ne’ebé servisu nu’udar ausiliár ba Governu hodi responde emerjénsia ba komunidade vulneravel-sira iha Timor-Leste.

CVTL estabelese iha tinan 2000 bazeia ba Dekretu lei 2005 no hetan rekoñesimentu hosi Governu no mós hosi nivél internasionál hodi sai membru 183 ba sosiedade internasionál Krús Vermella no Cresente Vermelho.

Durante CVTL eziste hala’o nia operasaun iha Munisípiu 12, inklui Rejiaun Administrativa Espesiál Oé-Cusse Ambeno (RAEOA).

Iha sorumutuk ho parseiru kooperasaun nian maka sei ko’alia kona-ba objetivu impotente-sira hodi haree liuliu ba misaun no vizaun CVTL nian, atu oinsá bele tulun di’ak ema mukit-sira no hodi bele tane sira nu’udár umana ne’ebé dignu iha sosiedade laran.

Vizaun no misaun CVTL nian mak atu salva vida no hadi’ak kualidade moris hosi ema mukit-sira, no mobiliza ka enkoraja foin-sa’e voluntáriu no komunidade hodi promove atividade umanitáriu-sira liuhosi organizasaun ne’ebé forte no sustentavel iha territóriu Timor-Leste.

Atividade hotu CVTL nian sei la’o tuir prinsípiu fundamentu hitu ne’ebé iha hanesan, Umanitáriu, Imparsialidade, Neutralidade, Independénsia, Voluntaridu, Unidade no Universalidade. Ho nune’e CVTL sei la halo diskriminasaun iha ninia atividade asaun umanitáriu hotu.

Sei partisipa iha sorumutuk ne’e mak inklui International Federation of Red Cross& Red Crescent (FRC), International Committee of Red Cross (ICRC), Australian Red Cross, New Zealand Red Cross, Indonesian Red Cross, Singapore Red Cross, Thailand Red Cross, Japanese Red Cross, Red Cross Society of China, Italian Red Cross, American Red Cross no Korean Red Cross.

Jornalista       : Arminda Fonseca

Editór             : Francisco Simões

 

HAKEREK NO HATÁN

Please enter your comment!
Please enter your name here