Membru Polísia Nasionál Timor Leste (PNTL), hosi Diresaun Nasionál Tránzitu, hala’o pasa revista iha área estádiu munisipál Dili no kontinua halo sosializasaun ba regra serka sanitária ba komunidade, segunda (17/05/21). Imajen Tatoli/António Gonçalves.

DILI, 17 maiu 2021 (TATOLI)—Polísia Nasionál Timor-Leste (PNTL), liu hosi Diresaun Saúde, rejista membru na’in 16 pozitivu COVID-19, hafoin submete ba teste swab masal iha Komandu Jerál, Caicoli, no mós iha territóriu tomak, iha semana kotuk.

Portavóz Komandu Jerál PNTL, Superintendente Xefe, Arnaldo de Araújo, informa membru hirak-ne’e iha ona sala izolamentu, hodi hala’o tratamentu saúde.

Notísia relevante:Komandu PNTL orienta membru unidade hotu-hotu teste swab

“Membru ne’ebé oras-ne’e ho rezultadu pozitivu, provizoriamente hamutuk na’in 16 iha teritóriu nasionál, tuir dadus hosi ekipa Saúde PNTL,” Superintendente Xefe, Arnaldo de Araújo, hateten liu hosi komunikadu, segunda ne’e.

Arnaldo de Araújo dehan, hosi totál membru ne’ebé pozitivu COVID-19, mai hosi unidade oi-oin, balun rekopera ona no balun sei kontinua hala’o tratamentu saúde.

Komandu alerta ba membru hotu-hotu atu kumpre nafatin regra Organizasaun Mundiál Saúde (OMS) no Ministériu Saúde (MS), hodi prevene an hosi transmisaun COVID-19.

Komandu PNTL, liu hosi Komandante Jerál, Komisáriu Polísia, Faustino da Costa, orienta membru hosi unidade hotu-hotu atu submete ba teste swab, iha 06 maiu 2021.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here