Progresu rekonstrusaun estrada iha Embaixada Japaun oin, domingu (16/05). Imajen/MOP

DILI, 16 maiu 2021 (TATOLI)—Rekonstrusaun emerjénsia estrada protokolu ne’ebé kotu iha Embaixada Japaun oin, iha Praia dos Coqueiros, kauza hosi dezastre naturál foin lalais, kuaze konklui.

Ministru Obra Públika (MOP), Salvador Eugênio Soares dos Reis Pires, kontinua orienta tékniku sira hodi akompaña projetu ne’e no daudaun iha faze tau ona asphalt.

“Rekonstrusaun permanente estrada protokolu ne’e hala’o ho emerjénsia hosi kompañia Montana Diak no daudaun atinje ona 96%, ne’ebé kompañia kontinua halo esforsu hodi finaliza iha tempu badak,” Ministru Salvador informa, liuhosi nota ne’ebé Agência Tatoli asesu domingu ne’e.

Notísia relevante: Rekuperasaun estrada Embaixada Japaun oin atinje 80%

Rekonstrusaun estrada hahú iha loron 20 abríl 2021, hafoin hetan desizaun hosi Konsellu Administrasaun Fundu Infraestrutra (KAFI) no realizasaun kontratu ba kompañia hodi rekonstrui estrada ne’e ho karater emerjénsia.

 Projetu rekuperasaun ho durasaun fulan ida, ne’ebé sei ramata iha fulan maiu nia laran ho kustu obra hamutuk $134.000.

 Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here