Uma komunidade iha Bidau ne’ebé hetan estragu hosi inundasaun iha 04 abríl 2021. Imajen Tatoli/António Gonçalves.

DILI, 16 maiu 2021 (TATOLI)—Diresaun Nasionál Ensinu Rekorente (DNER) kontribui ona $48.000 hosi totál osan millaun $4,2 ne’ebé Ministériu Edukasaun, Juventude no Desportu (MEJD) kontribui ba rekuperasaun nasionál tanba dezastre naturál.

Tuir Diretór Nasionál Ensinu Rekorente, José Artur Viana, osan hirak ne’e atu rekruta asesór espesífiku hodi elabora kuríkulu, maibé tanba situasaun kalamidade tenke kontribui verba balun.

“Ita-nia osan $48.000 ekivalente 7% atu elabora kuríkulu ensinu sekundáriu nível ekivalénsia maka hasai hodi oferese ba Ministériu Edukasaun Juventude no Desportu atu apoia kalamidade boot ne’ebé akontese iha loron 04 abríl liubá,” Diretór José Artur hateten ba Agência Tatoli via telefónika, domingu ne’e.

Notísia relevante: MEJD kontribui millaun $4.209 ba rekuperasaun nasionál

Diretór ne’e haktuir, to’o agora sira seidauk ezekuta orsamentu tanba situasaun Estadu Emerjénsia, Serka Sanitária no konfinamentu orbrigatóriu ne’e maka empede diresaun labele aselera prosesu rektutamentu asesór sira.

“Loloos tinan ida-ne’e ita loke ona vaga, maibé situasun hanesan ne’e difísil, entaun osan ba verba ne’e labele ezekuta. Entaun Governu husu aloka fali ba verba seluk ne’ebé presiza liu,” nia akresenta.

Diretór ne’e dehan, maski tinan ne’e orsamentu diresaun ko’a ona 7%, maibé tinan oin sei tau nafatin orsamentu ba verba no montante hanesan atu halo rekrutamentu asesór.

Orsamentu ho montante millaun $4,2 ko’a hosi verba kapitál dezenvolvimentu orsamentu MEJD tinan 2021, ne’ebé prevee atu aselera programa iha ensinu báziku no ensinu sekundáriu.

Iha tinan 2021, MEJD prevee orsamentu $111.478.459, ne’ebé aloka ba saláriu vensimentu $61.628.121, bens no servisu $16.650.131, kapitál menór $2.995.700, kapitál dezenvolvimentu $7.015.951, no transferénsia públika $23.188.556.

Jornalista: Tomé Amado

Editora: Julia Chatarina

HAKEREK NO HATÁN

Please enter your comment!
Please enter your name here