Illa Ataúro. Imajen/Espesiál

DILI, 16 maiu 2021 (TATOLI)—Nuno Alves (28), abitante ida ne’ebé mout iha tasi no konsege nani to’o rai-maran iha área Cristo Rei, daudaun simu ona tratamentu iha Hospital Nacional Guido Valadares (HNGV) tanba ikan tata ain to’o kanek, enkuantu Moises Tome (42) no Fredy Gomes (17) fila ba uma tanba kondisaun di’ak.

Tuir Médiku Sirurjia HNGV, José de Araújo, informa ohin dadeer ekipa konjunta lori abitante na’in-tolu mai parte emerjénsia no pasiente ida sira enkamiña ba parte sirurjia, tanba ain kanek iha parte karuk.

 “Nia-ain kanek, tanba ikan tubaraun mak tata, ain kanek kle’an no ran sai, maibé ohin ita konsege hapara ran. Ita hapara ran no fase ain halo moos hafoin ita sona ai-moruk no agora baixa iha ne’e atu kontinua kura nia kanek to’o di’ak hafoin ita bele haruka fila ba uma. Enkuantu rua seluk bele fila ba uma,” médiku Sirurjia hateten ba Agência Tatoli, iha ospitál nasionál, Bidau, domingu ne’e.

Notísia relevante: UPM-Naval kontinua buka abitante haat mout iha tasi

Tuir José de Araújo, kanek tanba animál tata iha risku ba infesaun, tanba ne’e nia parte halo ona tratamentu no sona antibiótiku hodi kanek bele maran lalais.

“Ami la taka kanek maibé suku pontu rua atu hapara ran, ran sai oituan hosi kanek ne’e,” nia akresenta.

“Normalmente pasiente sira trauma hela, tanba ne’e tenke observa oras ida ka rua, maibé laiha problema,” nia hatutan.

Antes ne’e, iha sábadu (15/05) ne’e, abitante na’in-hitu sai hosi portu marítima, Lecidere, maizumenus tuku 09:30 dadeer, ho ró kiik atu bá Ataúro, maibé to’o tasi klaran mout.

Ekipa konjunta hosi Polísia Nasionál Timor-Leste (PNTL), Unidade Polísia Marítima (UPM) hamutuk ho FALINTIL-Forsa Defeza Timor-Leste (F-FDTL) hosi komponete Naval, buka tuir abitante sira ne’ebé mout iha tasi klaran área Berau, illa Ataúro.

Nune’e, iha domingu dadeer tuku 08:00, ekipa konjunta konsege hetan abitante na’in-tolu no salva ho kondisaun di’ak, iha tasi área Cristo Rei, maibé haat seluk seidauk hetan.

Jornalista       : Nelia Fernandes

 Editora          : Julia Chatarina

HAKEREK NO HATÁN

Please enter your comment!
Please enter your name here