Arsebispu Arkidioseze Metropolitana Dili, Don Virgílio do Carmo da Silva, SDB. Imajen Tatoli/Dok.

DILI, 15 maiu 2021 (TATOLI)-Arsebispu Arkidioseze Metropolitana Dili, Don Virgílio do Carmo da Silva, SDB, sábadu ne’e, liuhosi komunikadu imprensa, deside kontinua suspende atividade misa ba públiku no sakramentu-sira iha vigararia Dili nian.

Notísia Relevante : Don Virgílio suspende atividade misa iha Vigararia Dili

Arsebispu Arkidioseze Metropolitana Dili deside Munisípiu Dili kontinua laiha selebrasaun atividade misa tanba  bazeia ba komunikadu imprensa hosi reuniaun Konsellu Ministru ne’ebé fó sai iha loron 12 maiu 2021, kona-ba hanaruk konfinamentu domisiliáriu jerál iha Munisípiu Dili, ba loron 14 tan.

“Ho ida ne’e, dala ida tan, ha’u komunika ba Pároku Relijiozu, relijioza no sarani-sira hotu, katak suspende selebrasaun misa ba públiku no sakramentu-sira iha vigararia Dill to’o loron ne’ebé konfinamentu obrigatóriu termina, iha loron 27 maiu 2021, oras 23:59,” Bispu Virgílio do Carmo da Silva, SDB hateten.

Nia hatutan, ba iha vigararia-sira seluk, hanesan Aileu, Ainaro, Ermera, no Rejiaun Administrativa Espesiál Oé-Cusse Ambeno (RAEOA) no Manifahi, kontinua atividade selebrasaun misa no sakramentu-sira ba públiku la’o hanesan baibain.

“Ha’u husu serimónia funeral hala’o tuir orientasaun hosi rezolusaun Governu nian (Cfr. Alínea 20 do Res. N°45/202). No durante fulan rozáriu (més de maio) iha vigararia Dili, reza tersu hala’o de’it iha família ida-idak no la iha prosisaun sira, maibé ba vigararia-sira seluk hala’o tuir tradisaun ne’ebé durante ne’e ita iha,” Don Virgílio hateten.

Nia husu ba sarani-sira atu kumpre nafatin medida preventiva-sira hanesan, uza máskara, fase-liman ho sabaun/hand sanitizer no distansiamentu sosiál, atu nune’e, ho finalidade atu garante hotu-hotu hetan saúde di’ak.

“Ha’u hato’o obrigadu wain ba komprensaun no kolaborasaun, ita Inan Lalehan, Maria Virjen, sei hamutuk ho ita no hamahan ita-hotu. Ha’ u nia bensaun ba imi hotu,” Arsebispu Arkidioseze Metropolitana Dili Don Virgílio do Carmo, SDB hateten.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here