Vasina AstraZeneca. Imajen Tatoli/António Gonçalves.

DILI, 15 maiu 2021 (TATOLI)—Sala Situasaun, Sentru Integradu Jestaun Krize (SS-SIJK), rejista  kazu pozitivu COVID-19 hamutuk 161, rekoperadu 126 no ativu 2.004.

“Kazu foun ne’ebé relata, ohin, 161, iha Dili 110, no iha munisípiu seluk 51, mane 107, feto 54. Sira ne’ebé ho idade 12 mai kraik iha na’in-haat, ho idade entre tinan 12 to’o 59 na’in 153 (91,2%), ho idade 60 mai kraik na’in-haat. Proporsaun kazu sintomátiku hamutuk 9%. Totál komulativu kazu konfirmadu sura hosi 21 marsu 2020 to’o 15 maiu 2021, hamutuk 4.279, rekoperadu 126 no ativu 2.004,” Koordenadór Forsa-Tarefa ba Prevensaun no Mitigasaun Surtu COVID-19 iha Timor-Leste, Rui Maria de Araújo, hateten liu hosi komunikadu, sábadu ne’e.

Notísia relevante:COVID-19: pozitivu 239, rekoperadu 86 no ativu 1.968

Hosi horisehik mai ohin, teste ne’ebé Laboratóriu Nasionál Saúde halo hamutuk 1.325 PCR, ho detalla hanesan tuir-mai, Vijilánsia sentinela 88, Rastreiu ba kontaktu ka Contact tracing 146, Rastreiu Aleatóriu ka Random Screening 336, Viájen sai-hosi serka sanitária hosi Dili 708, Viájen internasionál 12, Follow up iha kuarentena 35.

Totál testes PCR ne’ebé halo horsehik 14 maiu, iha munisípiu sira seluk, inklui RAEOA no HNGV hamutuk 456 ho detalla hanesan tuir-mai, Ermera 61, Maubisse 147, Maliana 19, Baucau 118, Viqueque 38, HNGV 34.

Atu bele hatene surtu ida ninia evolusaun, nomós surtu ne’e aumenta ka diminui, indikadór ida ne’ebé matenek-na’in epidemiolojia nian uza maka insidénsia. 

Konvensionalmente insidénsia sukat totál kazu foun, kada loron, pur 100 mil habitante, no hatudu risku ne’ebé populasaun iha atu hetan da’et moras ida.

Ho insidénsia COVID-19 iha Timor-Leste durante loron hitu ikus  maka 12,7/100 mil abitante, enkuantu ba de’it Munisípiu Díli 37,5/100 mil abitante.

Insidénsia iha leten sei nafatin hatudu katak, munisípiu Díli mak fatin ho risku bo’ot liu atu populasaun hetan da’et no hada’et tutuan virus SARS-CoV-2.

Informasaun hosi izolamentu

Iha 15 maiu 2021, izolamentu Vera Cruz halo tratamentu ba kazu detetadu na’in 31, Obstetrísia 14, Medisina interna 17. Na’in 14 iha obstetrísia kategoria moderadu hotu no sira-nia kondisaun estável.

Hosi 17 iha medisina interna, neen grave, ida uza ventiladór, rua uza CPAP, tolu uza oksijéniu na’in 11 moderadu.

Informasaun adisionál

Hakarak fó hanoin hikas ba públiku katak, bele uza númeru hotline 119, hodi kontakta ekipa operasionál iha Ministeriu Saúde, ezemplu, bainhira hakarak halo swab ba teste PCR, bele kontakta 119, hafoin ema ne’ebé atende telefone sei enkamiña ba ekipa vijilánsia epidemiolójika, hodi bele organiza.

Nune’e mós bainhira iha dúvida ka presiza atendimentu ruma relasiona ho Surtu COVID-19, halo favór liga ba 119.

Aproveita informa mós ba públiku katak, fatin atu halo teste PCR mak hanesan tuir-mai, bainhira sente moras isin-manas, mear, kakorok moras ka síntoma seluk tan bele bá konsulta iha Sentru Saúde ne’ebé besik atu bele halo swab.

Bainhira atu husu autorizasaun esesionál sai-hosi serka sanitária iha Díli, bele bá halo swab iha Centro Convenções Díli (CCD).

Bainhira sente katak, sai kontaktu-besik ba ema ruma ne’ebé detetau pozitivu ona, no seidauk hetan kontaktu hosi ekipa konjunta saúde,  bele liga ba númeru 119 atu organiza oinsá foti swab.

Ekipa Saúde na Familia (SnF) iha Sentru Saúde sira iha Dili, halo mós vizita ba bairru ho aldeia sira ne’ebé detetadu kazu barak ona.

Sira ne’ebé iha síntomas, ka sente kontaktu besik ho kazu pozitivu ruma, bele hakbesik ba sira hodi halo swab.

Apelu

Apela ba populasaun iha Timor-Leste laran tomak atu tu’ur hakmatek, kumpri ho rigór regra serka sanitária no konfinamentu domisiliáriu ne’ebé Konsellu Ministru (KM), deside no implementa ona hahú 30 abríl no estende tan ona semana rua ba oin.

Husu atu hotu-hotu kolabora ho autoridade saúde-sira hodi bele buka-tuir ema hotu ne’ebé hetan da’et ona virus ne’e no izola hosi ema ne’ebé seidauk hetan da’et tutan.

Apela ba populasaun iha Díli laran nomós iha Munisipiu sira seluk, atu aprezenta-an iha fasilidade saúde públiku ne’ebé besik, bainhira sente isin-manas, kakorok moras, inus-been, ka me’ar, hodi bele hetan atendimentu hosi profisionál saúde sira.

Bainhira sedu liu hatene se virus ne’e kona ita ka la’e, di’akliu, nune’e bele hetan atendimentu  sedu liu, no prevene tama ba iha situasaun  ne’ebé hanaran sindroma insufisiénsia respiratória aguda (SIRA) ka dada iis susar ka difisil atu dada iis.

Ba populasaun iha Timor-Leste laran tomak, favór respeita nafatin regra prevensaun no ijiéne individuál ne’ebé Governu hatuur ona atu prevene moras Covid-19 da’et ba mai.

Regra sira-ne’e mak hanesan, uza máskara, fase liman bebeik ho sabaun ka uza dezinfetante ruma, evita kose liman ba matan, inus ho ibun, bainhira kumprimenta-malu lapresiza kaer-liman, bensa-liman, rei-malu ka hakuak-malu, evita halibur-malu barak, hamriik ka tuur dook hosi ema seluk mínimu metru ida ho balun.

Jornalista  : Cipriano Colo

Editór        : Francisco Simões

HAKEREK NO HATÁN

Please enter your comment!
Please enter your name here