SEPS, Joaquim Gusmao, oferese materiál konstrusaun ba família vítima dezastre naturál iha sede suku Bemori, sesta (14/05/21). Imajen Tatoli/Nelson de Sousa.

DILI, 14 maiu 2021 (TATOLI)—Sekretária Estadu Protesaun Sivíl (SEPS), oferese materiál konstrusaun ba família hamutuk 21, iha suku Bemori, postu administrativu Na’in-Feto, munisípiu Dili, ne’ebé afetadu ba dezastre naturál, iha 04 abríl.

Iha sesta, SEPS distribui uluk ba família tolu ne’ebé uma hetan estragu totál no tuir planu, sábadu sei kontinua fahe ba família-sira seluk.

Notísia relevante:Simu apoiu umanitáriu, SEPS husu kumpre regra prevensaun COVID-19

Pakote materiál konstrusaun ba kada vítima ne’ebé uma hetan estragu totál, simu kalen 0.30m tahan 50, pregu kalén kg rua, pregu cm 12 kg rua, pregu cm 10 kg 2, pregu cm 7 kg haat, besi betón mm 10 barra 12, besi betón mm 8 barra 10, arme finu rolu  rua ho semente tonasa kg 40 saka 25.

Apoiu ne’e simbolikamente entrega direta hosi SEPS, Joaquim Gusmão, ba família-sira iha sede suku Bemori, sesta ne’e.

Joaquim Gusmão, hateten protesaun sivíl hahú lansa apoiu rekoperasaun, hodi responde ba família-sira ne’ebé uma hetan estragu. iha situasaun kalamidade.

“Apoiu ne’e ita sei fó bazeia ba kategoria estragu hanesan aat kamán, aat natón no aat totál. Tanba ne’e, espera ho apoiu Governu bele hakmán komunidade hodi rekonstrui fila-fali uma ne’ebé hetan estragu,’’ Joaquim Gusmão, hateten.

Joaquim Gusmão husu ba komunidade ne’ebé seidauk rejistadu, atu hato’o reklamasaun ba autoridade suku, hodi bele aprezenta fila-fali ba sentru operasaun dezastre, nune’e bele halo verifikasaun.

Governante ne’e hatutan, intervensaun protesaun sivíl ho lansamentu dahuluk  ba apoiu rekoperasaun ne’e no mós daudaun, kontinua distribui apoiu umanitáriu, hanesan ai-han no la’ós ai-han.

Iha fatin hanesan, Xefe Suku Bemori, Cristalina de Oliveira, agradese ba apoiu Governu, tanba bele rekopera hikas situasaun ne’ebé komunidade enfrenta.

Dadus hosi suku Bemori hatudu katka, família 21 mak afetadu, iha uma tolu mak aat totál no 18 aat kamán.

Tuir dadus hosi Ministériu Administrasaun Estatál (MAE) ho SEPS, rejista família afetadu dezastre naturál hamutuk 33.177 iha territóriu Timor-Leste (TL).

Hosi númeru ne’e, família  besik 90% mak hosi Dili no 10%  hosi munisípiu no intervensaun ne’ebé Governu hala’o maka, fó ona apoiu emerjénsia hanesan ai-han no la’ós ai-han, ba família 50% hosi totál família 33.177.

Ekipa ne’ebé lidera hosi MAE hamutuk ho protesaun sivíl no parseiru halo ona levantamentu dadus ba estragu, nune’e bele fó apoiu rekoperasaun hodi konstrui fila-fali.

Iha rezultadu levantamentu, identifika uma 25.000 mak afetadu, iha uma 24.000 aat kamán, aat natón 553 no aat totál 554.

SEPS hato’o ona pedidu ba Ministériu Finansa (MF), liu hosi fundu kontijénsia hamutuk milliaun $12, atu bele halo akizasaun ba nesesidade bázika, ba apoiu umanitáriu ba vítima dezastre naturál iha territóriu, tanba daudaun ne’e estok komesa menus.

Aleinde ne’e, SEPS kalkula kustu estimativa ba apoiu rekoperasaun ba rekonstrusaun uma ne’ebé hetan estragu durante dezastre naturál, hamutuk millaun $42.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here