Deputada Maria Anabela Sávio. Imajen/Espesiál.

DILI, 14 marsu 2021 (TATOLI)—Parlamentu Nasionál (PN) sei hasai imunidade ba Deputada Maria Anabela Sávio, hodi hatán iha tribunál iha semana oin kona-ba kazu kombustível ne’ebé akontese iha 2019.

Reprezentante bankada parlamentár sira ajenda ona deliberasaun kona-ba pedidu suspensaun funsaun ba Deputada Maria Anabela Sávio, kona-ba efeitu prosegimentu prosesu judisiál.

“Ohin, reuniaun líder bankada ajenda ona levantamentu imunidade Anabela Sávio iha segunda-feira, kona-ba kazu kupon mina ida-ne’ebé laloos. Ne’e ita bele dehan hafoer naran, nia loos tiha ona no prosesu ne’e bele taka, maibé tribunál mós ezije nafatin no nia mós ejize nafatin ba to’o rohan hodi hetan lialoos. Nia la’ós hanesan arguida, ba hanesan testemuña,” Sekretária Meza Parlamentu Nasionál, Deputada Lídia Norberta dos Santos, informa liuhosi konferénsia imprensa, iha uma fukun, sesta ne’e.

Entretantu Deputada Maria Anabela Sávio, prontu koopera ho justisa tanba sidadaun hotu-hotu iha lei nia okos.

“Ha’u ba nu’udar arguida, ha’u prontu no koopera tanba iha ita-nia nasaun ne’e lei mak boot liu ba ema hotu-hotu, laiha ema-ida mak boot liu fali lei. Ne’e kona-ba kazu akuza kupon ne’ebé akontese iha 2019 iha estasaun kombustível Lafaek,” Deputada Anabela Sávio hateten.

Deputada Anabela Sávio hosi bankada Frente Revolusionária Timor-Leste Independente (FRETILIN).

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here