Serimónia lansamentu Sistema Informasaun Rekursu Umanu Saúde (SIRUS), iha Otél Novo Turizmu, Díli, sesta (14/05/21). Imajen Tatoli/Felicidade Ximenes.

DILI, 14 maiu 2021 (TATOLI)— Ministra Saúde (MS), Odete Maria Freitas Belo, hamutuk ho Vise-Ministru Saúde, Bonifácio Mau Coli dos Reis, lansa Sistema Informasaun Rekursu Umanu Saúde (SIRUS), iha Otél Novo Turizmu, Díli, sesta ne’e.

Sistema Informasaun Rekursu Umanu Saúde ho objetivu atu konsolida mekanizmu rejistu dadus forsa traballu saúde iha teritóriu Timor-Leste.

Notísia relevante:MS lansa imunizasaun COVID-19 doze dahuluk, ba faze daruak

“Ami lori tempu kleur ona atu bele iha sistema ida hodi halo jestaun ba ami-nia rekursu umanu no preparasaun ne’e kleur, maibé ohin konsege lansa ona,” Odete Maria Freitas Belo hateten.

Apoiu ne’e mai hosi Organizasaun Mundiál Saúde (OMS), serbísu hamutuk ho Ministériu Saúde, no iha lansamentu iha buat balun ne’ebé mak prontu ona, no bele implementa, maibé sistema ne’e rasik sei presiza haree iha buat balun ne’ebé falta no tenki atualiza.

Tuir dadus hosi Diresaun Nasionál Rekursu  Umanu hatudu  katak, desde restaurasaun independénsia to’o agora, totál  forsa traballu saúde hamutuk 6.103, kompostu hosi rejime jerál 1.588 no  rejime espesiál 4515.

Rejime espesiál, kompostu hosi espesialista 63, médiku jerál  975,  parteira 796,  tékniku aliadu 882   no enfermeiru hamutuk 1.000-resin.

Partisípa iha lansamentu ne’e, reprezentante OMS Timor-Leste, Arvind Mathur ho ekipa, Diretór Jerál Serbísu Korporativu, Marcelo Amaral, Diretora Nasionál Rekursu Umanu, Tomasia de Sousa, Diretór Jerál Serbísu Nasionál Ambulânsia Emerjénsia Médika, Horácio Sarmento da Costa no seluk tan.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here