Foos ne’ebé rai iha CLN atu distribui ba estudante-sira kost iha Dili. Imajen Tatoli/Egas Cristóvão.

DILI, 14 maiu 2021 (TATOLI) – Diretór Ezekutivu Many Hands One Nation (MAHON, sigla ingles), Angelo Fernandez Nunes, klarifika katak tuir loos ohin tempu atu distribui ai-han bázika ba estudante nivel ensinu sekundáriu na’in-182 hela iha kost. Maibé tanba  pontu toleránsia Ministériu Edukasaun, Juventude no Desportu (MEJD) adia programa ne’e bá loron seluk.

Notísia Relevante : MEJD sei apoiu pulsa internet ba estudante ensinu báziku no sekundáriu-sira

“Loloos, ohin, ami halo distribuisaun ai-han bázika; foos saka 182, mina litru rua masa 182, supermi kaixa 46 ba estudante ensinu báziku na’in-182, maibé tanba t pontu toleránsia, MEJD adia ba loron seluk,” Angelo Fernandez Nunes, haktuir ba Agência Tatoli iha nia servisu fatin, Dili,  sesta ne’e.

Nia esplika maneira distribuisaun ai-han bázika ba estudante hela iha kost na’in-182 ne’e sei lao tuir oráriu ne’ebé trasa ona. Estudante na’in-30 mak simu uluk depois kontinua tan ba na’in-30 to’o finaliza.

“Ami iha ona númeru kontaktu estudante-sira nian. Sira hein de’it ami kontaktu,”  Angelo hateten.

Programa distribuisaun ne’e  la’ós foin hahú, maibé antes ne’e hala’o tiha ona. Faze dahuluk  MAHON halo ona distribuisaun ai-han ba estudante nivel sekundáriu no universidade hamutuk na’in-187.

Diretór Nasionál Asaun Sosiál Eskolár (DNASE), Joaquim Martins afirma hikas katak loos duni programa distribuisaun ne’e adia fali tanba loron ohin pontu toleránsia ne’ebé seidauk hatene atu hala’o fali bainhira.

“Ami hotu hein de’it desizaun hosi superiór-sira, ne’ebé ami labele promote buat ruma bainhira ami-nia superiór sira la hatene,” Joaquim Martins hateten.

Jornalista       : Tomé Amado

Editór             : Francisco Simões

HAKEREK NO HATÁN

Please enter your comment!
Please enter your name here