Inspetór Jerál Traballu, Rofino Lopes dos Reis. Imajen TATOLI/Antónia Gusmão

DILI, 14 maiu 2021 (TATOLI)—Inspesaun Jerál Traballu (IGT, sigla portugés) rejista otél no restaurante balun enfrenta difikuldade tanba rendimentu menus iha situasaun COVID-19, nune’e deside hapara traballadór provizóriu.

“Otél iha haat inklui restaurante tolu maka mai rejista tanba rendimentu menus, ita hatene situasaun reál agora, tanba ne’e sira deside hapara sira-nia traballadór,” Inspetór Jerál Traballu, Rofino Lopes dos Reis, informa ba Agência Tatoli, iha ninia knaar fatin, Hudi-laran, sesta ne’e.

Maski nune’e, jerente otél no restaurante sira sei bolu fali traballadór kuandu situasaun la’o normál filafali.

“Restaurante ida iha tasi ibun, ha’u labele mensiona nia naran, maibé bainhira nia lori karta mai iha ne’e, nia fó hatene ami katak haruka para traballadór na’in-ualu tanba situasaun maka labele loos ona no redimentu menus. Ami dehan labele haluha traballadór sira-nia direitu no parte otél no restaurante dehan sei bolu filafali traballadór bainhira situasaun normál,” nia haktuir.

Notísia relevante: COVID-19, Governu kria medida neen fó apoiu ba empregu sira

Tuir Inspetór, Jerente restaurante konta tuir mós katak traballadór ualu ne’e serbisu kleur ona.

“Sira serbisu kleur ona maibé situasaun obriga tanba laiha rendimentu, restaurante na’in durante ne’e selu saláriu traballadór ho nia osan rasik.  Ita haree tanba situasaun reál mak nune’e no aktividade ekonómika ladún la’o,” nia hatutan.

Aleinde ne’e iha loja balun hato’o mós pedidu ba IGT katak laiha aktividade ekonómika no rendimentu, nune’e sira deside redús traballadór balun.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here