Prezidente Agência TATOLI, Manuel Pinto (liman kuana), simu Embaixadór EUA iha Timor-Leste, Kevin Blackstone (liman karuk), bainhira vizita edifísiu Agência TATOLI, iha Faról, sesta (14/05). Imajen TATOLI/Egas Cristóvão.

DILI, 14 maiu 2021 (TATOLI)—Embaixadór Estadu Unidu Amérika (EUA), Kevin Blackstone, husu Governu Timor-Leste atu foti medida rigorozu no deside desizaun importante seluk atu bele luta kontra COVID-19 no bele salva Povu Timor-Leste, atu nune’e COVID-19 labele da’et ba ema hotu iha territóriu Timor laran tomak.

Notísia Relevante: Embaixadór EUA vizita Agência Tatoli

“Pandemia COVID-19 ne’e problema sériu no afeta ona iha nasaun sira iha mundu tomak no nasaun Amérika mós sofre ba virus ne’e. Tan ne’e husu ba Governu Timor-Leste atu foti medida rigorozu no deside desizaun importante seluk atu bele salva Povu Timor-Leste, atu nune’e COVID-19 labele da’et ba ema hotu iha territóriu Timor-Laran tomak,” Kevin Blackstone hateten ba Agência TATOLI hafoin ramata hasoru malu ho Prezidente Agência Tatoli ho nia estrutura tomak, iha Faról, Dili, sesta ne’e.

Tanba pandemia COVID-19 nu’udar moras ida sériu, Kevin Blacstone hautan, entaun Estadu Unidu Amerika (EUA) sei kontinua serbisu hamutuk ho Governu Timor-Leste atu fó apoiu konkretu hodi luta hasoru COVID-19 ne’e.

Prezidente Agência TATOLI, Manuel Pinto, ho nia estrutura hasai retratu hamutuk ho Embaixadór EUA iha Timor-Leste, Kevin Blackstone, hafoin vizita edifísiu Agência Tatoli, iha Faról, sesta (14/05). Imajen TATOLI/Egas Cristóvão.

EUA fó ona apoiu balun ba Timor-Leste iha tinan kotuk no tinan ida-ne’e, EUA sei prepara tán apoiu tuir mai ho montante millaun $4-resin hodi fó asisténsia no responde ba COVID-19. Tan ne’e, EUA sei kontinua atu halo parseria ho nasaun Timor-Leste to’o Governu bele ona kompleta nia desizaun konkretu hodi kombate ba kazu COVID-19.

EUA mós fó ona apoiu millaun $1.6 ba Timor-Leste iha tinan kotuk no espera katak sei prepara tán apoiu balun iha semana oin mai.

 “Ami prepara ona fundu ho totál $1.6 no mós ami planu tán ba osan adisionál nian hamutuk millaun $2.5. Tan ne’e, ami espera katak bele ona anúnsia iha fulan oin mai atu bele fó apoiu hodi kombate CIVID-19,” nia dehan.

Tuir planu, nia informa, Embaixadór Estadu Unidu Amérika ho Governu Timor-Leste liuhosi Ministériu Finansa sei asina akordu ida hodi apoiu ba programa country development strategy ba tinan lima nian, hodi foka liu ba dezenvolvimentu ekonomia iha rai-laran. 

“Iha semana oin ami sei asina akordu ida ho Governu Timor-Leste hodi implementa programa country development strategy ba tinan lima. Ami sei foka lia ba dezenvolvimentu ekonomia iha rai laran, ne’ebé mak aumenta osan hamutuk millaun $97 hodi fó apoiu ba dezenvolvimentu di’ak ba nasaun Timor-Leste,” nia haktuir.

Entretantu, tuir nia observasaun katak Timor-Leste nu’udar nasaun ida iha progresu di’ak tebes, hosi inisiu Timor-Leste hetan restaurasaun ba independénsia, tan ne’e mak EUA nafatin fó apoiu iha setór barak hodi nune’e Timor-Leste mós bele sai membru ASEAN.

 “Ami fó ona apoiu ho laran haksolok. Governu Estadu Unidu Amérika fiar katak Timor-Leste hetan ona progresu di’ak barak durante ukun rasik aan, hodi nune’e ami prepara ona apoiu balun ba iha área turizmu, agrikultura, programa saúde, no mós liuhosi projetu Costum Reform,” nia dehan.

Iha setór saúde, Embaixada Estadu Unidu Amérika apoiu ona program saúde iha munisípiu Covalima, no foka ba deliberasaun programa saúde ba ema sira-ne’ebé vulneravel sira.

Nia parte halo ona kooperasaun ho entidade importante sira iha nasaun soberania ida-ne’e, liuliu hasa’e kapasidade ba rekursu umanu iha Parlamentu Nasionál hodi valoriza ba prosesu demokrátika iha nasaun Timor-Leste.

Notísia Relevante: Embaixadór EUA-PPN ko’alia kona-ba demokrasia iha TL

Jornalista: Jose Belarmino De Sá

Editor: Cancio Ximenes

HAKEREK NO HATÁN

Please enter your comment!
Please enter your name here