Prezeidente PN, Aniceto Longuinhos Guteres Lopez. Imajen TATOLI /Antonio Goncalves

DILI, 14 maiu 2021 (TATOLI)—Prezidente Parlamentu Nasionál (PPN), Deputadu Aniceto Longuinhos Guterres Lopes, husu sidadaun hotu-hotu mantein kumprimenta regra prevensaun no mitigasaun hasoru propagasaun surtu COVID-19 no kolabora ho pesoál saúde sira iha terrenu.

“Nu’udar Prezidente Parlamentu Nasionál, ho laran tomak, ha’u husu nafatin ba sidadaun hotu-hotu atu mantein firme iha kumprimentu regra prevensaun no mitigasaun pandemia ne’e ho konsiénsia rasik iha ida-idak nia fatin, respeita no kolabora ho pesoál sira-ne’ebé halo servisu prevensaun no mitigasaun,” Prezidente Parlamentu Nasionál, hato’o mensajen ne’e iha uma fukun, sesta ne’e.

Nune’e hato’o informasaun ne’ebé di’ak no loloos ba malu, no fó kontribuisaun ba solusaun tanba pandemia COVID-19 ne’e presiza ema hotu nia kontribuisaun.

Prezidente Parlamentu Nasionál agradese ba pesoál hotu-hotu ne’ebé servisu iha liña frente ba pasiénsia, korajen, dedikasaun no empeñu profisionál iha serbisu ida-ne’e.

“Moras ne’e no dezastre naturál la hili sé mak atu sai vítima maibé bainhira hasoru sé de’it, nia mak sei sai vítima. Ne’eduni, mai ita hamutuk, tulun malu hodi fó solusaun ba situasaun ne’ebé ita hasoru. Mai, ita hasa’e ita-nia konsiénsia no hasa’e ita-nia korajen nafatin. Hametin ita-nia fiar katak dalan di’ak ba ita idak-idak ba Povu no nasaun,” PPN fó hanoin.

Prezidente PN husu ema hotu kontribui ba buka solusaun, kumpre regra saúde ba prevensaun no mitigasaun Covid-19, hahú hosi ida-idak nia-aan, hotu-hotu simu vasina ba, hodi aumenta imunidade hasoru Covid-19 no kuidadu-an no kuidadu ema seluk atu labele infetadu ho moras ida-ne’e.

Prezidente Parlamentu Nasionál, hateten pandemia COVID-19 fó impaktu makaas ba saude públika, ba moris, vida sosiál, ekonómika no funsionamentu órgaun Estadu nian. Ema la sente katak la presiza to’o tinan hodi hakotu COVID-19 maibé ho dixiplina, kumpre regra ho konsiénsia, kooperasaun di’ak bele kontinua luta hasoru pandemia ne’e.

“Rai sira, hanesan India, ne’ebé sofre makaas moras ne’e tanba la kumpre regra COVID-19. La fiar katak moras ne’e iha duni, la halo tuir regra saúde públika nian, uza razaun oioin hodi justifika hahalok sira-ne’ebé lori risku ba saúde individu no ba saúde públika,” PPN hateten.

Prezidente Parlamentu Nasionál lamenta ho tratamentu, atitude no liafuan violentu ne’ebé sidadaun balu hatudu hasoru pesoál saúde sira.

“Pesoál saúde balu mós infetadu tanba hala’o sira-nia kna’ar ne’ebé todan. Ho knaar ne’ebé todan no hasoru violénsia oioin, sira kontinua hala’o sira-nia servisu ho responsabilidade,” nia dehan.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here