CNTI halo konferénsia imprensa iha salaun IGT, Hudi laran, sesta (14/05). Imajen/Natalino Costa

DILI, 14 maiu 2021 (TATOLI)—Komisaun Nasionál Kontra Traballu Infantil (CNTI, sigla portugés) submete ona dokumentu importante rua ba Governu hodi halo protesaun labarik iha atividade traballu infantil.

“Ami halo serbisu lubuk ida no aprezenta ona dokumentu balun ba Governu, hodi nune’e bele ajuda tékniku sira hanesan Inspesaun Jerál Traballu (IGT, sigla portugés) halo kontrolu ba implementasaun eleminasaun traballu infantil iha Timor-Leste,” Prezidente CNTI, Aniceto Leto Soro, informa liuhosi konferénsia imprensa iha ámbitu loron mundiál kontra traballu infantil ne’ebé kada tinan sempre selebra iha loron 12 maiu, iha edifísiu IGT, iha Hudi-laran, sesta ne’e.

Notísia relevante: CNTI husu Governu elimina traballu infantil iha Timor-Leste

Dokumentu rua ne’e hanesan planu nasionál kontra traballu infantil hodi aprezenta ba Sekretaria Estadu Formasaun Profisionál no Empregu (SEFOPE) no Ministériu Koordenadór Asuntu Ekonómiku (MKAE) atubele analiza no lori ba Konsellu Ministru atu aprova, nune’e bele fasilita tékniku sira halo serbisu.

Tuir Prezidente Komisaun, eleborasaun planu nasionál ne’e halo ona konsultasaun públika ho parte relevante no parseiru sira hanesan Konfederasaun Sindikatu Timor-Leste (KSTL), Kámara Komérsiu no Indústria, Timor-Leste (CCI-TL,sigla portugés), SEFOPE no parseiru sira hanesan Programa Nasaun Unida ba Dezenvolvimentu (UNDP, sigla ingés), Fundu Nasaun Unida ba Labarik (UNICEF, sigla inglés), ne’ebé konsultasaun ikus realiza foin lalais iha Timor Plaza.

Nia esplika, planu nasionál ne’e iha objetivu hanesan fahe informsaun kona-ba traballu infatil, fó formasaun ba  inan-aman sira atu halo protesaun ba sira-nia oan sira, hodi labele halo serbisu no seluk tan. 

Aleinde ne’e, hosi parte CNTI serbisu hamutuk ho Komisaun Direitu labarik atu halo dokumentu balun liga ba labarik hotu atu hetan protesaun.

“Ami prepara hela kódigu protesaun ba labarik, hanesan tinan zero to’o 18 konsidera hanesan labarik ida. Tanba ne’e, mai ita serbisu hamutuk lolo liman ba malu hodi proteje ita-nia oan sira atu nune’e bele partisipa másimu iha prosesu konstrusaun Estadu Direitu Demokrátiku,” nia subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here