Diretór Ezekutivu ADTL, Cesário da Silva. Imajen Tatoli/Egas Cristovão.

DILI, 14 maiu 2021 (TATOLI) – Diretór Ezekutivu Assosiação de Deficientes de Timor-Leste (ADTL), Cesário da Silva, preokupa ho nia  membru defisiente matan no tilun na’in-40 iha eskola ensinu rekorrente nivel ensinu báziku to’o agora seidauk hetan distribuisaun rezumu matéria.

Notísia Relevante : ADTL apoia inisiativa DNER atu elabora kurríkulu Ensinu Sekundáriu

“Ami hanoin hela situasaun ida ladún di’ak ba ami nia maluk defisiénsia-sira. Ema hotu hetan ona rezumu matéria, ami nia maluk na’in-40 to’o agora la hetan rezumu matéria halo ami sente  la kontente,” Cesário da Silva, informa ba Agência Tatoli iha ninia servisu fatin, Dili, sesta ne’e.

Cesário husu ba Diretór Dirasaun Nasionál Ensinu Rekorrente (DNER) atu orienta profesór na’in-haat inklui tradutór lian jestuál ida ne’ebé apoiu maluk defisiente-sira atu prepara rezumu matéria ba maluk defisiénsia-sira  hodi bele aprende netik buat ruma.

Nia esplika, maluk defisiénsia matan ho tilun-sira durante ne’e hetan apoiu matéria hosi profesór espesífiku ne’ebé Ministériu Edukasaun, Juventude no Desportu kontrata. Maluk defisiénsia matan hetan matéria ho letra brael no sira defisiénsia tilun tenke halo eskrita tanba antes ne’e nesesita ho tradusaun lian jestuál.

Diretór Nasionál Ensinu Rekorrente (DNER), José Artur Viana, rekoñese estudante defisiénsia matan no tilun na’in-40 seidauk hetan duni rezumu matéria, maibé semana oin nia garante sira bele hetan ona matéria.

“Serka sanitária no konfinamentu obrigatóriu ne’e mak halo ita-nia estudante no profesór-sira la tama, nune’e difisil atu hasoru malu. Semana agora, ami tuur hamutuk no ha’u garante sira bele hetan ona rezumu matéria,” José Artur hateten.

Jornalista       : Tomé Amado

Editór             : Francisco Simões

HAKEREK NO HATÁN

Please enter your comment!
Please enter your name here