Armazén ai-moruk SAMES. Imajen Tatoli/António Gonçalves.

DILI, 13 maiu 2021 (TATOLI)—Diretór Ezekutivu, Serbisu Autónomu Medikamentu no Ekipamentu Saúde (SAMES), Santana Martins, preokupa ho ai-moruk ne’ebé ladún movimentu ba fasilidade saúde-sira   tanba laiha pedidu, durante periúdu Serka Sanitária.

“Preokupasaun ne’ebé agora daudaun ami senti maka, konsumu ba medikamentu. Katak, pedidu ladún iha, no gastu la hanesan ho situasaun normál. Ai-moruk ita sosa tiha maibé la uza,” Santana Martins, hateten ba jornalista-sira iha nia kna’ar fatin, kinta ne’e.

Notísia relevante:Ministériu Saúde rekoñese produtu iha SAMES menus

Nia esplika, durante ne’e pedidu barak liu ba Ekipamentu Protesaun Pesoál (PPE), maibé ai-moruk ladún, tanba ne’e, parte SAMES koko halo komunikasaun ho fasilidade saúde-sira, maibé informasaun ne’ebé iha katak, situasaun COVID-19 mak halo ema barak tauk ba halo tratamentu iha fasilidade saúde-sira.

“Bainhira ai-moruk la movimentu, sei fó implikasaun bele ameasa expire, tanba utilizasaun ne’ebé ladún  iha,” nia subliña.

Tanba ne’e, diretór ezekutivu SAMES ne’e apela katak, bainhira ai-moruk ka produtu preparadu hela, labele tauk ba fasilidade saúde atu halo tratamentu.

“Ami observa iha média katak, bainhira ba ona fasilidade saúde sei teste swab mak ema lakohi ba,’’ nia esplika. 

Iha fasilidade saúde-sira, tuir padraun ne’ebé Governu define katak, 10% estok tenki disponível, la signifika tenki 100% estok iha, maibé ezemplu item ida ne’ebé ba tratamentu A laiha, doutór-sira bele substitui ho ai-moruk seluk.

Ai-moruk 130 mak estok mamuk

Oras ne’e daudaun, ai-moruk ne’ebé estok laiha iha armazén sentrál SAMES iha item 130.

“Medikamentu ne’ebé rejistadu iha SAMES hamutuk item 452. Ita iha item 322 mak disponível no item  130 mak estok laiha,” Santana hateten.

Maski la temi detalla, maibé hosi item 130 ne’ebé laiha, parte SAMES konsidera tenki halo lalais intervensaun atu labele prejudika pasiente-sira liu-liu sira ne’ebé iha nível Ospitál Nasionál Guido Valadares (HNGV), Ospitál Rejionál no Ospitál Referál-sira.

Nia fó ezemplu ida de’it mak hanesan, ai-moruk vitál Carbamazepine scored 200mg tabs, ba ema-sira ne’ebé sofre liman no ain to’os, presija kompleta no ai-moruk tenke iha.

Tanba ne’e, SAMES komunika ona atu bele sosa hosi Indonézia, nune’e mós Autrália, no hein hela transportasaun mai TL.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here