Prezidente Komisaun A PN, Joaquim dos Santos, Imajen Tatoli/António Gonçalves

DILI, 13 maiu 2021 (TATOLI)—Reprezentante povu iha uma fukun Parlamentu Nasionál, husu Governu halo auditoria ba implementasaun subsídiu 60% nune’e verifika ezekusaun ne’e la’o tuir polítika Governu nian iha vijénsia COVID-19.

Notísia Relevante: Governu Fó Subsídiu 60%, Kompañia Tenke Kontribui 10% ba Governu

“Tuir loloos ne’e Governu entende diretamente ho kompañia ne’ebé fó serbisu ba sidadaun sira, kuandu Governu haruka diretamente ba sidadaun (traballadór) nia konta bankária ne’e konforme ba nia na’in (na’in ba konta bankária), se nia-na’in lakohi fó karik. Sé mak iha mundu ne’e lakohi osan,” Prezidente Komisaun A (Justisa no Konstitusionál), Deputadu Joaquim dos Santos ‘Boraluli’ ko’alia iha Parlamentu Nasionál, kuarta ne’e.

Nia hatutan, kuandu selu ona 100% iha aplikasaun serka sanitaria ne’e entaun kompañia tenke ko’alia fali ho Governu nune’e muda mekanizmu pagamentu ne’e, tanba deskonfia fó ba kompañia maibé kompañia la fó ba traballadór sira.

Nia dehan, se kompañia selu saláriu 100% durante estadu emerjénsia entaun kompañia tenke ko’alia ho traballadór nune’e bele rekupera fali kompañia, maibé ne’e hanesan Timor-oan maioria Katólika.

“Boa fé ida-ne’e kompañia sira labele uza sala fali, nune’e mós ita traballadór sira labele uza sala fali ita-nia boa fé ne’e. Ha’u hanoin ida-ne’e Governu tenke halo auditoria ba implementasaun subsísiu 60% nune’e bele hatene benefísiu hosi polítika Governu nian ba traballadór no empreza sira,” nia dehan. 

Prezidente Komisaun A ne’e subliña, se traballadór sira seidauk simu mak Governu manda ba traballadór sira-nia konta bankária mak kompañia hakarak hasai fali ne’e labele, maibé sira simu tiha ona entaun kompañia tenke ko’alia didi’ak ho traballadór sira.

“Tuir lei ne’ebé ita aprova ne’e kompañia mós hetan 60%, nia iha obrigasaun 40%, agora 60% ne’e kompañia labele foti hotu, ne’e tenke ajusta ho nia despeza ne’ebé selu ba traballadór sira nune’e labele hamosu injustisa, maibé ita defende ne’e justisa tanba efeitu sira hosi estadu emerjénsia ne’e kompañia mós sofre resesaun ba ninia produtu traballu, tanba ne’e mak Governu asume obrigasaun estadu ninian,” nia dehan.

Tuir lei númeru 8/2021, 3 maiu, alterasaun dahuluk ba lei númeru 14/2020, 29 dezembru kona-ba Orsamentu Jerál Estadu 2021 ka orsamentu retifikativu aprova medida apoiu sósiu-ekonómiku ho montante millaun $45,5.

Artigu 4 hosi lei ne’e define apoia entidade empregadór no traballadór sira iha idak-idak nia konta bankária própria. Subsídiu ne’e tantu 60% no subsídiu ba liña frente nian iha prevensaun propagasaun surtu COVID-19.

Governu atribui 60% ne’e ba kompañia privadu sira inklui mós mídia sira-ne’ebé eziste iha Timor-Leste maibé tenke integra liuhosi seguransa sosiál.

Tuir informasaun ne’ebé Agência TATOLI rekolla hosi traballadór mídia privadu sira, katak dirijente mídia sira hahú aviza, bainhira subsídiu 60% ne’e tama iha konta bankária traballadór sira tenke entrega ba kompañia. Razaun tenke entrega tanba durante aplikasaun estadu emerjénsia selu saláriu 100%, maibé balun la selu 100% obriga traballadór sira tenke entrega ba kompañia.

Ho preokupasaun hirak ne’e, Prezidente Komisaun A ne’ebé trata asuntu Justisa no Konstitusionál, husu instituisaun kompetente halo auditoria.

Notísia Relevante: Governu Halo Ona Pagamentu Subsídiu 60% ba Traballadór Hamutuk 605

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here