Portaun Meskita An-Nur, Dili, taka metin iha loron Idul Fitri. Imajen Tatoli/Arminda Fonseca

DILI, 13 maiu 2021 (TATOLI)-Musulmanu iha mundu, inklui Timor-Leste, kinta ne’e, selebra festa-boot Idul Fitri, 1 Syawal 1442 Hijriah. Maske nune’e, musulmanu-sira iha Dili no iha munisípiu-sira labele selebra festa vitória ne’e hamutuk hodi reza iha meskita-sira tanba kumpre hela serka sanitária no konfinamentu obrigatóriu.

Notísia Relevante : Idul Fitri Fó Espíritu Foun ba Musulmanu Atu Di’ak Liu Tan iha Loron Oin

Musulmanu-sira mós la la’o ba malu tuir sira-nia tradisaun atu hato’o “minal aidin wal faizin”  ka husu perdaun ba malu, hanesan tinan-sira liubá tanba situasaun pandemia COVID-19.

Prezidente Konsellu Nasionál Izlámika Timor-Leste, Pascoal Sidiq Lemorai. Imajen Tatoli/Arminda Fonseca

Prezidente Konsellu Nasionál Izlámika Timor-Leste, Pascoal Sidiq Lemorai, hateten, festa Idul Fitri importante tebes ba musulmanu iha mundu tomak, inklui Timor-Leste, maibé tanba Timor-Leste enfrenta sitasaun serka sanitária no konfinamentu obrigatóriu domisiliáriu, maka musulmanu ida-idak selebra de’it iha sira-nia uma laran.

“Durante fulan Ramadan nia-laran atividade ne’ebé ami halo maka jejún no reza ka solat tarawih durante loron-30 nia laran. Sé laiha serka sanitária no konfinamentu obrigatóriu karik, ami reza ka solat Idul Fitri hodi selebra  festa Idul Fitri 1442 H,” Pascoal Sidiq Lemorai, hateten ba jornalista sira iha Meskita An-Nur,  Kampung Alor, Dili.

Nia hatutan, maske ohin komunidade musulmanu iha Timor-Leste, la selebra misa Idul Fitri  hamutuk iha Meskita An-Nur, maibé liuhosi mídia online grupu Musulmanu nian, Imam boot hosi Meskita nian nafatin hanorin Maromak Nia liafuan ba nia komunidade Musulmanu sira, oinsá atu hametin fiar iha moris loroloron nian.

“Tanba durante fulan ida nia laran ami halo ona jejún ne’e signifika katak tinan ida nia laran ami halo sala barak hasoru ema ho ema, entaun, ohin ne’e hamoos ami-nia klamar no hahalok hosi sala,  hahú simu fila-fali moris foun,” nia esplika.

Prezidente Konsellu Nasionál Izlámika Timor-Leste ne’e dehan, ohin ne’e maluk musulmanu barak mak mai Meskita atu reza, maibé antes loron tolu tama festa Idul Fitri, sira halo reuniaun boot iha Meskita An-Nur, Kampung Alor, deside katak ba Meskita An-Nur, Dili, laiha atividade loron Idul Fitri no atividade sira seluk tanba kumpre serka sanitária no konfinamentu obrigatóriu.

“Ami la halo atividade tanba orden ne’ebé ita-nia Governu hasai katak Dili aplika konfinamentu obrigatóriu,” nia tenik.

Ba Munisípiu sira seluk Prezidente Konsellu Nasionál Izlámika Timor-Leste ne’e dehan, horikalan nia parte, fó hotu ona avizu  ba komunidade musulmanu iha munisípiu sira katak hotu-hotu  labele halo festa hodi halibur malu, maibé Munisípiu balu aplika de’it serka sanitária ne’ebé ohin ne’e dala ruma balu bele selebra no dalaruma mós lae.

Nia husu ba komunidade musulmanu hotu iha Timor laran tomak, katak ohin laiha serimonia halibur malu tanba situasaun mak obriga no nu’udár musulmanu ne’ebé durante loron 30 halo ona jejún no moris foun hikas ona iha tenke halo tuir nafatin Maromak Nia liafuan no hatudu hahalok ne’ebé di’ak ba malu.

Observasaun Agência TATOLI iha terrenu nota katak, hahú hosi oras tuku 6:00 to’o tuku 7:00 dadeer iha komunidade musulmanu lubuk ida mak ba Meskita An-Nur, Dili, atu hasa’e sira-nia orasaun iha loron Idul Fitri ida-ne’e, maibé la konsege tanba portaun-boot Meskita An-Nur nian taka metin.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here