L-JEP halo konferénsia imprensa iha salaun esperansa, Elemloi-Delta, kinta (13/05. Imajen/Natalino Costa

DILI, 12 maiu 2021 (TATOLI)—Liga Juventude Estudantíl Patriótika (L-JEP) husu ba Governu aplika medida sosiu-ekonómiku ne’ebé adekuadu ba povu tanba ho impozisaun serka sanitária ho konfinamentu domisiliáriu jerál obrigatóriu iha munisípiu Dili, halo atividade ekonómiku barak mak paralizadu.

“Estadu as vezes dook hosi sidadaun tanba ukun no bandu laiha ona sensibilidade ba realidade sosiál povu nian. Medida ne’ebé Estadu aplika la kompleta ho medida sosiu ekonómiku,” Koordenadór Jerál L-JEP, João Travolta, hateten liuhosi konferénsia imprensa ne’ebé hala’o iha salaun esperansa, Elemloi-Delta, kinta ne’e.

Koordenadór Jerál ne’e nota katak durante ne’e ema barak lakon serbisu no laiha kondisaun moris atu sustenta família.

Biban ne’e, liga juventude husu Governu fó flexibilidade regra iha ámbitu serka sanitária no konfinamentu obrigatóriu, nune’e atividade ekonómika bele la’o normál.

“Daudaun aktividade ekonómika nasaun nia la’o ladún di’ak no aktividade aprendizajen ladún la’o halo estudante barak mak sofre iha situasaun pandemia ne’e,” nia akresenta.

Tanba ne’e, nia husu Governu tenke tau atensaun ba medida sira tanba iha estudante barak mak moris iha Dili.

“Balun tenke eskola no tenke buka serbisu, maibé hos situasaun ne’e la hetan kondisaun finanseira atu sustenta sira-nia moris no selu eskola,” nia hatutan.

Iha Orsamentu Jerál Estadu (OJE) 2021 Retifikativu, iha mudansa ba dotasaun Fundu COVID-19, ne’ebé ho montante inisiál $31.000.000, hetan reforsu $256.641.793, nune’e ninia totál hamutuk $287.641.793.

Nune’e, fó biban ba Governu hodi finansia medida sosio-ekonómiku hanesan apoiu ba empregu millaun $45,3, moratória kréditu millaun $2, izensaun pagamentu propina ba estudante ensinu superiór millaun $14, subsídiu internet ba estudante ensinu superiór millaun $2,2, sosa produtu alimentár hosi produtór lokál millaun $12.

Nune’e mós, subsídiu ba eletrisidade, finansia operasaun Sala Situasaun-Sentru Integradu Jestaun Krize (SS-CIGC, sigla portugés) millaun $16,7, finansia suplementu remuneratóriu ba traballadór liña frente millaun $51,9, no konklui pagamentu ba programa Cesta Bázika millaun $31.

Governu sei implementa medida sosiu-ekonómiku iha tempu besik nia laran.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here