Ministru Koordenadór Asuntu Ekonómiku, Joaquim Amaral. Imajen TATOLI/Egas Cristóvão

DILI, 12 maiu 2021 (TATOLI)--Ministru Koodenadór Asuntu Ekonómiku, Joaquim Amaral, hateten, Governu fó ona sinál konfiansa ba TL-Cement liuhosi aprova ona provizaun partisipasaun fundu Estadu Timor-Leste ho montante millaun $50, ba investimentu empreza ne’e.

“Ha’u hanoin se laiha difikuldade tanba pandemia globál, liu-liu aplikasaun konfinamentu, tanba ita bele lansa iha tinan ida ne’e  atu  TL-Cement hahú projetu instalasaun fábrika simentu iha Baucau,” Ministru Joaquim hateten ba Agência TATOLI iha edifísiu Ministériu Finansa (MF), Aitarak-laran, kuarta ne’e.

Notísia relevante: MKAE propoin mantein provizaun partisipasaun millaun $50 iha TL-Cement

Tuir governante ne’e dehan, Governu Timor-Leste ho empreza TL-Cement halo hela preparasaun no laiha difikuldade atu hahú lansamentu ba investimentu ne’e.

“Ita haree laiha difikuldade, tanba ne’e bainhira lockdown ramata, bele halo movimentu aviaun la’o di’ak hodi aselera  investimentu, liu-liu Prezidente, Jamees Rhee ho ekipa Konsellu Administrasaun Timor-Leste bele tuur hamutuk,” nia akresenta.

Governu Timor-Leste mantein provizaun partisipasaun hosi prazu adisionál fulan sia, to’o loron 31 dezembru 2021.

Governu mós nomea reprezentante Estadu hanesan Konsellu Administrasaun TL-Cement hanesan Ministru Koordenadór Asuntu Ekonómiku hamutuk ho Ministru Finansa, Rui Augusto Gomes, atu hamutuk ho Konsellu Administrasaun empreza australianu ne’e hodi halo planu no dezisaun estratéjiku tanba sai ona empreza konsórsiu.

Tuir planu, TL-Cement sei harii fábrika simentu iha zona luan ne’ebé nakonu ho ahu-ruin (kalkáriu) ho kualidade a’as iha rejiaun Baucau no sei halo produsaun simentu iha faze bázika fábrika hodi halo esportasaun no simentu ba abastesimentu konstrusaun sivíl iha Timor-Leste.

Komunidade lokál mak sei sai benefisiáriu dahuluk ba projetu ne’e tanba sei abranje objetivu boot tolu kona-ba reforma ekonómika hanesan aumenta investimentu privadu, promove diversifikasaun ekonómika no promove empregu sustentavél.

Iha 17 maiu 2016, Governu Timor-Leste no TL-Cement asina akordu espesiál investimentu ba projetu.

Iha tinan 2018, Governu liuhosi reniaun Konsellu Ministru estraordináriu aprova rezolusaun ba koardu espesiál ida ho empreza TL-Cement hodi aselera progresu implementasaun fábrika simentu iha munisípiu Baucau hodi loke kampu servbisu ba joven sira purvolta 300 iha faze dahuluk, hafoin kontinua too 1.000-resin.

 Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here