Logotipu EIF. Imajen/EIF

DILI, 12 maiu 2021 (TATOLI)–Timor-Leste partisipa iha reuniaun meza redonda dahuluk hamutuk ho nasaun membru 35, ne’ebé organiza hosi Sekretariadu Ezekutivu Enhanced Integrated Framework (EIF) via virtuál, iha loron 05 maiu, iha Jenebra, Suíça, hodi rona progresu ne’ebé país sira alkansa ona.

EIF nu’udár parseriu dezenvolvimentu ne’ebé ajuda país sira menus dezenvolvidu (LDCs, sigla ingles) liuhosi apoiu komérsiu, nu’udár medida hodi hasa’e kreximentu dezenvolvimentu sustentável no mós redusaun kiak.

Tuir Reprezentante Timor Leste ba EIF, Cesar Dias Quintas, parseiru multilaterál ne’e konsege halibur ona país 54, ne’ebé hakarak alkansa problema restrisaun komersiál iha nasaun kiak sira inklui Timor-Leste.

“Reuniaun rutina ho país membru hodi rona pontu vista hosi serbisu hirak ne’ebé halo ona. Timor-Leste kontinua ho ninia prontindaun hakarak rona rekomendaun sira hodi hadi’a serbisu iha futuru,” Reprezentante Timor Leste Cesar Dias Quintas, relata liuhosi nota imprensa ne’ebé Agência TATOLI asesu, kuarta ne’e.

Reuniaun téknika ne’e hodi rona mós kompromisu Governu Timor-Leste liuhosi asina nota entedimentu entre Ministru Koordenadór Asuntu Ekonómiku (MKAE), Joaquim Amaral ho Reprezentante EIF, iha loron 18 marsu 2021, hodi fó apoiu tékniku inklui apoiu  orsamentu hamutuk $300.000 ba períodu tinan rua, hahú hosi 2021–2022.

Iha biban ne’e, Timor Leste hetan onra no apresiasaun hosi Sekretariadu Ezekutivu EIF iha Jenebra, Suíça, kona-ba progresu hirak ne’ebé alkansa iha faze implementasaun projetu EIF, maski país ne’e enfrenta hela  propagasaun surtu COVID-19 no kalamidade dezastre naturál.

Nota entedimentu ne’ebe asina ona entre Governu Timor-Leste no EIF,  haklean vontade Timor-Leste realiza projetu EIF hanaran Institutional Capacity Building for Timor-Leste’s WTO Accession and Trade Integration.

Nune’e mós, harii Timor-Leste Aid for Trade Unit ne’ebé sei foka  liu iha prosesu adezaun Timor-Leste ba Organizasaun Mundiál Komérsiu (OMK).

“Projetu EIF  sei ajuda tebes Timor-Leste iha área komérsiu, liu-liu kona-ba  prosesu adezaun Timor-Leste sai país membru  OMK  ne’ebe sei akontese iha dezembru 2021, haktuir hosi roadmap ne’ebé fó sai hosi Sekretariadu OMK iha Jenebra” Reprezentante Timor-Leste ba EIF subliña.

Kontribuisaun únika hosi serbisu IEF nian mak investe iha komérsiu ba dezenvolvimentu, enkoraja propriedade país, atua nu’udár koretór onestu, finansiamentu ho nia eskala,  serbisu iha ekonomia vulnerável sira no  troka koñesimentu ho nia inovasaun.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here