Reprezentante Rezidente UNDP iha Timor-Leste, Munkhtuya Altangerel no Sekretáriu Estadu Formasaun Profionál no Empregu, Alarico do Rosário, asina akordu estájiu profisionál ba joven foin ramata estudu universitáriu, iha salaun SEFOPE, kuarta (12/05). Imajen TATOLI/Natalino Costa

DILI, 12 maiu 2021 (TATOLI)–Sekretaria Estadu Formasaun Profisionál no Empregu (SEFOPE) selebra akordu kooperasaun ho United Nations Development Programme (UNDP), hodi kapasita joven foin ramata estudu universitáriu sira liuhosi programa estájiu profisionál hodi hetan esperiénsia.

“Programa ne’e tulun ita-nia alin foin-sa’e sira ne’ebé foin gradua hosi universidade, hodi bele halo estájiu atubele hetan esperiénsia,” Sekretáriu Estadu Formasaun Profionál no Empregu, Alarico do Rosário, informa iha edifísiu SEFOPE, Caicoli, kuarta ne’e.

Programa ne’e iha faze dahuluk sei benefisia ema na’in-80, ne’ebé sei foka iha negósiu kiik, indústria no área seluk tan, ho durasaun tempu estájiu durante fulan tolu nia laran.

“Ita-nian joven ne’ebé hakarak tuir programa ne’e bele tau naran iha SEFOPE, nune’e ami maka sei lori sira halo estájiu iha instituisaun revante ne’ebé sira hakarak,” nia akresenta.

Governante ne’e husu joven sira atu aproveita didi’ak programa ne’e tanba iha área interesadu barak atu aprende no bele hetan osan.

Iha fatin hanesan, Reprezentante Rezidente UNDP iha Timor-Leste, Munkhtuya Altangerel, hateten, akordu ne’e atu kapasita joven ne’ebé seidauk iha empregu, nune’e liuhosi programa ne’e bele kria kampu traballu ba sira-nia an.

“Programa ne’e foin atu realiza no benefisiáriu sira mak foin-sa’e sira,” nia hatutan.

Nia konta tuir, antes ne’e UNDP tulun ona joven timor-oan liuhosi apoiu fundu balun hodi kapasita sira iha vida emprendedurizmu.

“Ami-nia susesu boot antes ne’e, ami apoiu joven sira halo negósiu iha knua fila liman no daudaun  sira susesu,” nia tenik.

Tanba ne’e, UNDP komprometidu sei kontinua apoiu SEFOPE iha futuru, liuhosi programa estájiu hodi kapasita joven foin ramata estudu iha universiade maibé seidauk hetan serbisu.

Jornalista: Natalino Costa

Editora: Julia Chatarina

1 KOMENTÁRIU

  1. Oinsa Ho Ami Nebe Foin Remata Sekondario Bele Hola Parte?
    OU Ida formasaun Ne Ba Ema Nebe Mak Remata Ona UniVersidade

HAKEREK NO HATÁN

Please enter your comment!
Please enter your name here