Madre Guilhermina Marçal. Imajen Tatoli/Dok

DILI, 12 maiu 2021 (TATOLI) – Madre Guilhermina Marçal, konsidera programa ensinu distánsia ka ensinu online laiha vantajen ba estudante-sira atu kebra sira-nia kakutak.

Notísia Relevante : Presiza fasilita formasaun ba profesór ho dosente-sira kona-ba utiliza aula online

“Dezde tinan kotuk to’o ohin loron ita haree atividade aula prezensiál ne’e menus loos, ida online ne’e mak barak, ha’u bele dehan sistema online ne’e hatún tiha ona maneira kontaktu umanu entre profesores no estudante-sira,” Madre Guilhermina hato’o nia perspetiva ne’e bainhira sai oradora iha forum meza redonda iha edifísiu Institutu Nasionál Siénsia Teknolojia (INCT), Dili, kuarta ne’e.

Madre Guilhermina hateten, oinsá mak estudant- sira atu kebra sira ninia kakutak se loroloron de’it sira simu maka distribuisaun rezumu matéria hosi eskola depois prienxe hatama filafali ba eskola. Maneira hanesan ne’e, tuir Madre Guilhermina, laiha vantajen ba estudante-sira atu prepara sira-nia an iha futuru.

“Ba ha’u problema tanba estudante hela tiha iha uma simu de’it matéria ezame la’ós tan nia mak fera ulun entrega fali ba inan aman ka maluk seluk mak halo nia ba halimar tiha depois hotu ona nia lori ba hatama de’it. Entaun laiha vantajen,” Madre Guilhermina aprofunda tan.

Nia  esplika sistema aula online ne’ebé Governu implementa tinan ida ona ne’e kria hela lakuna tanba labarik-sira laiha meius atu asesu matéria online.

“Atu hadi’a buat ne’ebé ladi’ak ha’u hein Na’i Maromak tulun ita atu hakotu pandemia COVID-19 ne’e atu edukasaun bele lao fila-fali, labarik-sira bele filafali ba eskola atu hetan fali matéria,” Madre Guilhermina hateten.

Jornalista       : Tomé Amado

Editór             : Francisco Simões

HAKEREK NO HATÁN

Please enter your comment!
Please enter your name here