Ministru Prezidénsia Konsellu Ministru, Fidelis Manuel Leite Magalhães. Imajen TATOLI/Egas Cristóvão

DILI, 12 maiu 2021 (TATOLI)—Durante reuniaun Konsellu Ministru (KM) iha kuarta ne’e, Ministru Transporte no Komunikasaun (MTK), José Agustinho da Silva, aprezenta opsaun polítika-lejizlativa kona-ba regulamentu ba organizasaun servisu inspesaun ró-ahi no embarkasaun sira.

“Aprezentasaun ne’e ho objetivu hodi halo análize preliminár ba opsaun polítika-lejizlativa sira ba estabelesimentu norma no prosedimentu rejistu no servisu inspesaun utilizasaun ró no embarkasaun nian, tuir padraun internasionál seguransa no protesaun ambiente tasi nian,” Ministru Prezidénsia Konsellu Ministru, Fidelis Manuel Leite, informa hafoin ramata reuniaun ezekutivu iha salaun Ministériu Finansa (MF), Aitarak-laran, kuarta ne’e.

Notísia relevante: MTK aprezenta opsaun polítika-lejizlativa servisu inspesaun ró no embarkasaun

Tuir Portavóz Governu, proposta ne’e foin iha faze aprezentasaun, tanba ne’e KM sei rona hikas aprezentasaun iha reuniaun ezekutivu tuir mai hodi aprova.

Antes ne’e, Governu aprova ona rejistu nasionál ba ró-ahi no embarkasaun sira ba propriedade atubele dada sa’e bandeira Repúblika Demokrátika Timor-Leste (RDTL) nu’udar indikasaun ba nasionalidade no halai iha tasi tuir jurizdisaun Timor-Leste nian.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here