Primeiru-Ministru, Taur Matan Ruak, prezide reuniaun Konsellu Ministru, iha salaun Ministériu Finansa, Aitarak-laran, kuarta (12/05). Imajen TATOLI/Egas Cristóvão

DILI, 12 maiu 2021 (TATOLI)—Vise Primeiru-Ministra no Ministra Solidariedade Sosiál no Inkluzaun (MSSI), Armanda Berta dos Santos, halo aprezentasaun iha reuniaun Konsellu Ministru (KM) kona-ba planu estratéjiku ba períodu tinan 2021 to’o 2025.

“Planu estratéjiku ne’e ho objetivu atu asegura protesaun sosiál, seguransa no moris di’ak ba sidadaun hotu,” Ministru Prezidénsia Konsellu Ministru, Fidelis Manuel Leite Magalhães relata hafoin ramata reuniaun ezekutivu ne’e iha salaun auditóriu Ministériu Finansa (MF), Aitarak-laran, kuarta ne’e.

Portavóz Governu dehan, ho planu ne’e, iha tinan lima oin mai MSSI hakarak promove asaun sosiál no asisténsia sosiál ba sidadaun hotu.

Notísia relevante: INSS seidauk implementa fundu rezerva seguransa sosiál

“Nune’e, bele garante seguransa sosiál ba ema hotu no promove reinsersaun sosiál atu garante inkluzaun sosiál, hodi redús dezigualdade jéneru, reforsa papél feto, promove direitu labarik no ema sira ho defisiénsia inklui reforsa kapasidade institusionál hodi atinje objetivu sira,” governante ne’e esplika.

Iha ámbitu seguransa sosiál ba sidadaun, Governu liuhosi MSSI inisia kontribuisaun ba seguransa sosiál iha outubru 2017 to’o agora, nune’e iha 16 setembru 2020 estabelese Fundu Rezerva ba Seguransa Sosiál (FRSS).

Objetivu kriasaun fundu atu asegura no iha ligasaun direta ho estabilizasaun finanseira no sustentabilidade rejime kontributivu seguransa sosiál.

Enkuantu, Institutu Nasionál Seguransa Sosiál (INSS) rekolla ona orsamentu hosi seguransa sosiál hamutuk millaun $93.

Aleinde ne’e, iha tinan 2020 INSS rejista ona benefisiáriu hamutuk 100.000 no hosi númeru ne’e 47% hosi setór públiku no 53% hosi setór privadu.

Kontribuisaun seguransa sosiál hamutuk 10% hosi totál saláriu benefisáriu kada fulan, ne’ebé kompostu hosi 4% hosi traballadór (benefisiáriu) no 6% hosi empregadór (instituisaun Estadu/na’in ba kompañia).

Jornalista: Antónia Gusmão

Editor: Julia Chatarina

HAKEREK NO HATÁN

Please enter your comment!
Please enter your name here