Komunidade iha suku Comoro, kapitál Dili, troka voucher iha supermerkadu Leader ho produtu Cesta Bázika, kinta (10/12). Imajen TATOLI/António Gonçalves

DILI, 12 maiu 2021 (TATOLI)-Governu liuhosi Ministériu Koodenadór Asuntu Ekonómiku (MKAE) agradese Komisaun Anti Korrupsaun (CAC, sigla Portugés) ne’ebé  monitoriza no deskobre ona irregularidade hosi kompañia distributór balun durante implementasaun programa Cesta Bázika.

“CAC halo serbisu di’ak tebes, ne’ebé ha’u agradese. CAC hala’o serbisu tuir nia dalan no desizaun ikus mak kompañia sira komete irregularidade tenke kumpre prosedimentu sira ba distribuisaun Cesta Bázika,” Ministru Koordenadór Asuntu Ekonómiku, Joaquim Amaral, hateten iha edifísiu Ministériu Finansa, Aitarak-laran, kuarta ne’e.

Notísia relevante: CAC deskobre irregularidade balun durante distribuisaun Cesta Bázika iha Dili

Tuir governante ne’e, kompañia sira komete irregularidade hanesan fahe sasán la to’o kuantidade no montante osan ne’ebé Governu determina ona, tenke kompleta hodi bele hetan pagamentu.

Ministru dehan, inspesaun CAC ajuda tebes Governu hodi bele garante prosesu distribuisaun Cesta Bázika ba sidadaun sira tuir kontratu.

“Ami dezeju CAC kontinua tau-matan ba programa nasionál Governu atu komunidade hotu bele hetan direitu ho di’ak no merese hetan,” nia akresenta.

Kona-ba prosesu pagamentu, kompañia distributór ne’ebé komete irregularidade maibé hetan ona pagamentu, iha ona prosesu atubele haruka fó fila osan tuir kuantidade ne’ebé distribui la tuir kontratu.

Nune’e, nia husu ba Kompañia distributór sira atu kontinua kumpre kontratuál hodi garante kuantidade no kualidade sasán, nune’e benefisiáriu sira simu tuir sira-nia direitu ne’ebé Governu deside ona.

“Ami husu nafatin ba autoridade lokál no benefisiáriu sira, bainhira hetan distributór fahe sasán la tuir kuantidade bele keixa ba ministériu implementadór sira no CAC,” nia tenik.

Dadaun ne’e, Progresu distribuisaun Cesta Bázika ba territóriu nasionál atinje ona 87%, maski iha períodu Serka Sanitária iha munisípiu balun, maibé entidade responsável sira esforsu hodi kontinua halo distirbuisaun.

“Ita bele konklui programa Cesta Bázika ne’e iha tinan ne’e,” nia hatutan.

Entertantu, hosi inspesaun ne’ebé realiza iha fatin balun iha kapitál Dili, ekipa CAC deskobre infrasaun iha item na’an karau ne’ebé distribi ba benefisiáriusira la to’o kilgrama ida.

Tuir kontratu no tabela ne’ebé estabeleseidu, kada ema sei simu na’an kilogram ida, maibé kompañia fornese de’it grama 800 (0,8kg), signifika benefisiáriu sira lakon direitu grama 200 (0,2kg).

Hafoin ne’e, CAC notifika kedan responsável kompañia hodi buka solusaun no responsável deklara prontu kompleta na’an 0,2kg=$2,30 ba kada benefisiáriu hamutuk 3.265 ho ninia totál kustu  $7.509,50.

Nune’e, iha loron 25 marsu 2021, CAC liuhosi servisu prevensaun  konsege trava osan ho valór $56.587, 50 no haruka ba entidade kompetente iha Governu.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here