Diretór Jerál Empregu SEFOPE, Paulo Alves. Imajen TATOLI/Egas Cristóvão

DILI, 12 maiu 2021 (TATOLI)—Diretór Jerál Empregu hosi Sekretaria Estadu Formasaun Profisionál no Empregu (SEFOPE), Paulo Alves, informa, daudaun ne’e traballadór timor-oan balun iha Austrália kontratu ramata ona, tanba ne’e uza de’it vistu atividade temporária ho sub-klase 408.

“Traballadór hamutuk na’in-260 maka husu ona vistu protesaun ho númeru 408, entaun ami mos preokupa. Tanba ne’e, ami informa kedan ba Embaixada Austrália iha Timor-Leste, maibé iha Austrália rasik ema sira dehan ba ami katak maski traballadór sira nia vistu mate maibé sira hetan protesaun, tanba ne’e polísia no imigrasaun labele kaer sira,” Diretór ne’e informa iha salaun SEFOPE, Caicoli, kuarta ne’e.

Maski nune’e, SEFOPE husu ba traballadór timor-oan iha Austrália atu ida-idak kansela vistu protesaun ne’ebé maka sira iha, tanba balun hili halo vistu protesaun hodi asegura sira-nia an iha Austrália.

“Sira kontratu remata ona, tanba ne’e SEFOPE halo aprosimasaun ho família iha Timór hodi kontaktu direta traballadór sira hodi kansela vistu protesaun, hodi nune’e sira bele fila ona mai, maibé durante ne’e sira la halo no labele fila,” nia akresenta.

Notísia relevante: Traballadór timor-oan 152 aranka ona bá Austrália

Ba kestaun ne’e, tuir Dirijente ne’e, SEFOPE antisipa ona bainhira kontratu ramata, fasilita traballadór sira hodi labele halai ses hosi sistema.

Aleinde ne’e, SEFOPE mós antesipa atu problema labele akontese tan ba traballadór sazonál, maka komunika ona ba Governu Austrália atu halo repatriasaun traballadór timor-oan hamutuk 100 iha tempu badak.

“Sira serbisu iha Tasmánia no maioria kontratu ramata ona, tuir loloos sira mai ona Timór maibé tanba situasaun Estadu Emerjénsia no Serka Sanitária ne’ebé laiha voo komersiál, tanba ne’e ita halo komunikasaun ho Departement of Home Affair no Embaixada Austrália iha Timor-Leste, katak Austrália sei oferese kustu balun hodi apoia ita-nia traballadór iha ne’ebá, liu-liu kona-ba kestaun kuarentena iha Darwin,” nia hatutan.

Iha fatin hanesan, Sekretáriu Estadu Formasaun Profisionál no Empregu, Alarico do Rosário, halo ona karta ba Sala Situasaun-Sentru Integradu Jestaun Krize (SS-CIGC, sigla portugés) hodi husu autorizasaun repatria traballadór timor-oan iha Austrália.

“Ohin ha’u asina tan karta ida atu haruka ba Sala Situasaun atu aprova ita-nia alin sira mai Timór tanba sira-nia kontratu hotu ona iha Austrália,” governante ne’e subliña.

 Jornalista: Natalino Costa

Editora: Julia Chatarina

1 KOMENTÁRIU

  1. Oinsa sira ne’ebe muda ona ba sidade seluk hodi servisu, sira ne’e mai husi kompnia ida deit iha Tasmania ka sira ne’e trabalhador espesial iha Timor-leste ba Australia ne’e?

HAKEREK NO HATÁN

Please enter your comment!
Please enter your name here