Diretór Jerál Empregu SEPFOPE. Paulo Alves Imajen TATOLI/Egas Cristovão

DILI, 12 maio 2021 (TATOLI)—Sekretaria Estadu Formasaun Profisionál no Empregu (SEFOPE) rejista traballadór timor-oan ne’ebé serbisu iha Korea Súl, balun enfrenta problema pasaporte mate, tanba ne’e parte relevante halo hela koordenasaun atu rezolve.

“Informasaun ne’ebé ita simu hosi adidu, iha ita-nia traballadór hamutuk 50 nia pasaporte expira, normalmente kuandu ita atu estende pasaporte ne’e, kuandu laiha situasaun COVID-19, Ministériu Justisa (MJ) no SEFOPE sei haruka ofisiál ruma atu trata, maibé tanba tinan ne’e iha situasaun COVID-19 maka difísil tebes,” Diretór Jerál Empregu hosi SEFOPE, Paulo Alves, informa iha salaun SEFOPE, Caicoli, kuarta ne’e.

Maski nune’e, SEFOPE halo ona koordenasaun ho MJ no Ministériu Negósiu Estranjeiru no Kooperasaun (MNEK) atu  buka dalan no rezolve kestaun ne’e.

“Ita iha dalan bainhira situasaun la permite, sei iha desizaun hosi nai ulun sira iha área relevante bele halo buat ruma hanesan oferese dokumentu ruma hodi fasilita traballadór sira ne’ebé pasaporte mate,” nia akresenta.

Tuir Dirijente ne’e, karik esforsu hotu la konsege maka SEFOPE sei koordena ho MNEK hodi komunika ba parte Embaixada Timor-Leste iha Korea.

Jornalista: Nalino Costa

Editora: Julia Chatarina

HAKEREK NO HATÁN

Please enter your comment!
Please enter your name here