Administradór Munisípiu Manufahi, Arantes Isaac Sarmento, hamutuk grupu agrikultór-sira koko mákina modernu kuda-batar iha Aldeia Loro Tahap Satu, Suku Betanu, Postu Administrativu Same. Imajen/Espesiál

DILI, 12 maiu 2021 (TATOLI)-Administradór Munisípiu Manufahi, Arantes Isaac Sarmento hateten, ohin, Munisípiu Manufahi halo lansamentu dahuluk ba mákina modernu kuda-batar ne’ebé oferese hosi Food and Agrculture Organization (FAO).

Notísia Relevante : MAP-FAO sei Estabelese Sistema Kolleita Udan-been iha Illa Jaco

Nia hatutan, atividade lansamentu ba mákina modernu ida-ne’e tanba parte Administrasaun Munisípiu Manufahi servisu hamutuk Agrikultór Munisípiu nian ho mós parseiru internasionál FAO ne’ebé mak servisu hamutuk hala’o programa ida ho naran Konservasaun Agrikultura (CA-sigla portugés) ba agrikultór-sira iha Postu Administrativu Same, Suku Betano.

“Hosi programa Konservasaun Agrikultura ida-ne’e mak FAO apoiu Governu liuhosi Agrikultór Munisípiu nian apoiu mákina modernu lima ho ninia funsaun keta-ketak hanesan, mákina kuda-batar tolu, kuda leher ida no dulas batar, entaun ohin ami halo lansamentu utiliza mákina modernu ida-ne’e, no tuir planu ba oin FAO sei apoiu tan mákina 50,” Arantes Isaac Sarmento informa ba Agência Tatoli liuhosi telefónika, kuarta ne’e.

Nia afirma, objetivu FAO apoiu mákina modernu kuda-batar ba agrikultór-sira tanba durante ne’e agrikultór-sira bainhira atu kuda batar sempre uza ai-suak mak kuda. Nune’e ho ekipamentu modernu ida-ne’e atu bele muda pensamentu agrikultór-sira hosi tradisionál ba iha modernu.

 “Ha’u agradese tebes ba FAO tanba bele apoiu ona mákina kuda-batar ba agrikultór-sira, tanba mákina kuda-batar ne’e la’os ba batar de’it maibé bele uza  kuda ai-dila, no ai-farina, entaun ida ne’e ajuda tebes ba agrikultór,” nia tenik.

Mákina-sira ne’ebé FAO apoiu ba Manufahi sei oferese ba grupu agrikultór-sira iha Suku Betano nian, tanba to’os ne’ebé daudaun ne’e grupu agrikultór uza hamutuk ektare 50.

Jornalista       : Arminda Fonseca

Editór             : Francisco Simões

 

HAKEREK NO HATÁN

Please enter your comment!
Please enter your name here