Hospitál Nasionál Guido Valadares (HNGV). Imajen Tatoli/Egas Cristóvão.

DILI, 12 maiu 2021 (TATOLI)— Assosisaun Enfermeiru Timor-Leste (AETL), komemora loron enfermeiru internasionál ba dala 47 ho tema, ‘Enfermeiru-nia lian mak sei lidera vizaun kuidadu saúde iha futuru’.

“Parabens ba enfermeiru tomak iha mundu rai-klaran, espesiál ba enfermeiru Timor-Leste (TL), ne’ebé ohin 12 maiu,  selebra aniversáriu internasionál ba dala 47,” Sekretáriu Jerál AETL, Domingos Soares, hateten liu hosi komunikadu, iha kuarta ne’e.

Notísia relevante:AETL Louva Servisu Enfermeiru Timoroan

Domingos Soares husu ba enfermeiru tomak iha TL, atu hamrik halo inovasun iha komunikasaun hosi fuan no laran, tuir étika profisionál ne’ebé opta, hodi bele atende pasientes no mós komunidade ho profisionál.

Nia mós rekoñese katak, durante ne’e enfermeiru TL hasoru dezafiu barak, hanesan sempre simu lia makás hosi pasiente-sira, maibé espíritu no promesa ne’ebé enfermeiru-sira halo liu hosi juramentu labele mate, tanba kualkér situasaun no kondisaun sempre prontu.

Nune’e mós membru AETL, Santana Martins, enkoraja membru hotu iha territóriu tomak, atu ho komemorasaun loron internasionál infermeiru-nian iha tinan ida ne’e, maski ho situasaun COVID-19, maibé kontinua haboot nafatin espíritu hodi serbí komunidade ho neon no laran.

Nia apela, atu bainhira hala’o serbisu tenke kuidadu an uluk, nune’e bele hadook aan hosi moras COVID-19, atu sebí pasiente ho isin di’ak.

Oras-ne’e daudaun membru AETL hamutuk 2.000, no balun iha hela prosesu rezistrasaun atu sai membru.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here