Embaixadór Austrália iha Timor-Leste, Peter Roberts. Imajen TATOLI/Egas Cristovão

DILI, 12 maiu 2021 (TATOLI)—Embaixadór Austrália ba Timor-Leste, Peter Roberts, hateten Governu Timor-Leste ho Austrália no setór privadu sira presiza dezenvolve konseitu sira molok hahú prosesu dezenvolvimentu kadoras greater sunrise.

Notísia Relevante: José Reis seidauk haree estudu viabilidade kona-ba dada kadoras mai TL

“Austrália ho Timor-Leste asina ona akordu iha 2002 no tinan rua liubá (2018) Primeiru-Ministru mai Timor-Leste atu implementa akordu ne’e, nune’e greater sunrise ne’e presiza konseitu dezenvimentu. Ne’e la’ós de’it Timor-Leste no Austrália maibé inklui mós setór privadu ne’ebé iha direitu atu halo esplorasaun greater sunrise,” Peter Roberts informa ba Agência TATOLI, hafoin hasoru malu ho Prezidente Parlamentu Nasionál, Deputadu Aniceto Longuinhos Guterres Lopes, iha uma fukun, kuarta ne’e.

Nia dehan, parte Austrália, Timor-Leste no setór privadu sira presiza tuur hamutuk hafoin kontinua prosesa dezenvolvimentu ne’e bá-oin.

“Agora defísil uitoan tanba foka ba coronavirus maibé setór privadu mós sei ko’alia ho Governu Timor-Leste no Austrália kona-ba prosesu dezenvolvimentu ba greater sunrise. Austrália prontu ko’alia ho Timor-Leste kona-ba oinsá bele dezenvolve greater sunrise,” nia dehan.

Nia parte kontente tanba kompañia Santos ne’ebé oras ne’e serbisu iha posu Bayu Undan tanba investimentu setór privadu asutralianu sira setór minerál.

Peter espera prosesu dezenvolvimentu greater sunrise ne’e bele atrai investidór hodi halo investimentu iha área esplorasaun no área sira seluk.

Atu dada ba Austrália ka mai Timor-Leste ne’e kesi ona ba setór privadu ne’ebé iha direitu atu halo esplorasaun, tanba setór privadu sira mak sei investe.

“Naran katak iha diskusaun ne’e entre Austrália, Timor-Leste ho setór privadu sira. Maibé importante setór privadu ne’ebé iha direitu atu dezenvolve greater sunrise, deside katak oinsá atu dezenvolve, oinsá bele hetan benefísiu ekonomia di’akliu ba Timor-Leste, tanba ne’e importante ba Timor-Leste hetan osan barak hosi greater sunrise,” nia akresenta.

Embaixadór Australia ba Timor-Leste ne’e fiar katak prosesu ne’e depende ba setór privadu no depende ba merkadu mundiál.

Tuir akordu Fronteira Marítima ne’ebé Governu Timor-Letse no Austrália asina 6 marsu 2018 iha sede Organizasaun Nasaun Unida (ONU) define “konseitu hosi dezenvolvimentu” signifika termu jerál sira-ne’ebé sei uza hodi dezenvolve kampu Greate sunrise.

Nune’e mós aneksu B kona-ba rejime espesiál Greater Sunrise nian, iha artigu 1 (objetivu hosi rejime espesiál Greater Sunrise nian, define mak dezenvolvimentu, explorasaun no jestaun konjuntu sira hpsi petróleu iha kampu sira Greater Sunrise nian, ba benifísiu ba parte sira hanesan.

Purtantu artigu 2 hosi anexu B define propriedade kona-ba Petróleu no partilla reseita sira nian, alínea 1 hateten, petróleu hotu ne’ebe produzidu iha kampu sira Greater Sunrise ne’e propriedade Timor-Leste no Austrália nian

Alínea 2 hosi anexu ne’e mós hateten, parte sira tenke partilla reseita sira husi upstream, ka reseita sira direitamente rezultante husi esplorasaun upstream petróleu produzidu nian iha kampu sira Greater Sunrise, katak proporsaun 70% ba Timor-Leste no 30% ba Austrália bainhira kadoras dada mai Timor-Leste. Nune’e mós proporsaun 80% ba Timor-Leste no 20% ba Austrália, bainhira kadoras dada ba Austrália.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here