Ekipa Bombeiru regra-hela ahi-han edifísiu FMC-TL, iha área Mandarin, suku Motael, postu administrativu Vera Cruz, munisípiu Dili. Imajen Tatoli/Eugénio Pereira.

DILI, 12 maiu 2021 (TATOLI)—Edifísiu Federasaun Motór Siklizmu Timor Leste (FMC-TL sígla portugés) iha área Mandarin, suku Motael, postu administrativu Vera Cruz, munisípiu Dili, aat totál tanba inséndiu ne’ebé akontese iha tersa (11/05) tuku 22:00 otl.

Parte FMC-TL aluga edifísiu hosi abitante ida iha área ne’e, no bainhira akontesimentu, uma na’in laiha fatin.

Notísia relevante:SEPS ho SEA observa fatin inséndiu Bebonuk

Helder Vieira nu’udár uma na’in sente hakfodak bainhira hetan kontaktu hosi viziñu katak, ahi-han uma.

“Ahi han ona uma mak ami mós tun mai hosi Bebora no kolega balun mak mai ajuda ekipa Bombeiru hodi regra ahi. Tanba akontesimentu ne’e ami sai hela,” Helder Vieira hateten, durante konversa ho ekipa PNTL no Bombeiru iha Mandarin.

Nia dehan, hosi inséndiu ne’e la rezulta ema kanek no mate, maibé sasán uma laran no dokumentu importante hosi FMC-TL, inklui fasilidade uma laran ahi han mutuk.

Iha fatin hanesan, abitante Balbino Noqueira Gonçalves, deskonfia inséndiu ne’e kauza hosi sirkuitu eletrisidade.

“Ami iha uma kotuk, derrepente haree ahi han ona uma, su’ar makás loos, foin mak ami kontaktu Bombeiru. Maibé, ita seidauk hatene loloos sirkuitu eletrisdade ka kauza seluk,” nia hateten ba jornalista Agência Tatoli.

Observasaun jornalista Agência Tatoli iha terrenu katak, ekipa Bombeiru ho karreta tanki rua konsege rega-mate ahi ho tempu oras rua.

Iha fatin akontesimentu mós, ekipa Polísia Nasionál Timor Leste (PNTL), munisípiu Dili, koordena ona ho parte família no mós parte FMC-TL, hodi rekolla dadus prelimináriu kona-bá inséndiu ne’e.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here